نبدأ على بركة الله، أولا بالكفتة في إناء نتبل اللحم المفروم مع البصل المفروم والتوابل (الملح، الكركم، الفلفل الأسود، سكين جبير مع تابل الكفتة) مع ملعقة كبيرة شابلور مطحون ناعم وملعقة كبيرة مزيج بين قصبر ومعدنوس مطحونين نخلط الكل جيدا حتى تنسجم المكونات.

نكروها كريات صغيرة ونقليها في القليل من الزيت مع ملعقة كبيرة زبدة نحمرها من كل الجهات، نخليها بجيه.

في هاذ الوقت نكون غسلت البطاطا جيدا ونقيتها وقطعتها قطع صغيرة وحطيتها تفور كي طابت وهي عاد سخونة طحنها بالطحانة اليدوية.

وهي دافية نضيف عليها التوابل (الملح حسب الذوق، الكركم، تابل الجبن، الثوم والبصل بودرة، رشة خفيفة من الزعفران، فلفل أسود، فلفلة حمرة) مع صفار حبة بيض (البياض نستعملو من بعد في الترميد) مع ملعقة كبيرة مزيج بين قصبر ومعدنوس مطحونين، نخلط الكل جيدا حتى تتجانس المكونات، نغطيها ببابي فيلم وندخلها للثلاجة تبرد مليح مليح أنا خليتها ساعة تحكم روحها.

ثم نشكل كريات متساوية في الحجم حطيت في وسط كل كرية حبة كفتة وعاود غلقت عليها مليح، كما هو موضح في الفيديو.

بنفس الطريقة حتى كملت كل الكريات اللي عندي، من جهة أخرى نجيب 3 صحون واحد حطيت فيه الفرينة متبلة وصحن فيه بياض البيض مع حبة بيض كاملة والقليل من الملح ضربتهم مليح وصحن آخر حطيت فيه شابلور (الخبز يابس مطحون ومتبل)، حطيت كريات البطاطا في الفرينة ثم البيض ثم شابلور حتى نكمل كل الكمية اللي عندي.

نحط كمية من الزيت في مقلاة (استعملت كاسرونة صغيرة باش الزيت تغمر الكريات) نخليها تسخن مليح ثم نقص عليها شوية ونبدأ نحط الكريات في الزيت، نحرك المقلاة بطريقة دائرية ونخليها تدي لون ذهبي جميل من الجهتين.

والحبة اللي تنقلى نحطها فوق ورق ماص، حتى نكمل كل الكمية اللي عندي.
وقدمتهم بألف صحة وهنا😋🥔😋.

تجي مقرمشة من الخارج وطرية من الداخل والأكيد بزاف بنينة 👌🏻 شهية طيبة للجميع🥰.