نبدأ بإسم الله (الطريق الأولى)، نغسل حبات البرتقال جيدا، وزنت 4 كلغ، نبرش البرتقال الطبقة البرتقالية فقط ما لازمش نوصل للطبقة البيضة لأنو هي اللي دير لمرورة.
ملاحظة مهمة: ✔لكل 1 كلغ برتقال (حامض) نديرو 400غ سكر أما إذا كان البرتقال حلو نقصو كمية السكر.

نحط مبشور البرتقال في وعاء واسع ونفرغ عليه السكر ونحرك الكل جيدا.

ثم نقوم بعصر البرتقال (استعملت العصارة اليدوية تدي شوية جهد ووقت) ونضيفه للسكر نكمل كل الكمية اللي عندي بنفس الطريقة

نحركوه مليح مليح نغلق على الوعاء (بورت موونجي) وندخلها للثلاجة ليلة كاملة ومرة على مرة نحركو باش يذوب السكر تماما، يصبح ثقيل مثل السيرو.

في الغد نجبدوه من الثلاجة ونمكسيوه (نرحيه) جيدا ونصفيوه بالصفاية الرقيقة

هذاك اللي بقى في الصفاية نستعملو لتنكيه الحلويات والتحليات.

فرغت المركز اللي تحصلت عليه في علبة وغطيتها ببابي فيلم ودخلتها للمجمد.
ملاحظة مهمة: ✔من بعد عند الإستهلاك نعبر بالكاس ونفرغو في قارورة ونضيف الماء (كاس واحد من المركز يقابل 4 كيسان من الماء).
خليتو في العلبة لأنو هاذ المركز ما يجمدش (مايوليش حجرة)

أما بالنسبة للطريقة الثانية نفس مراحل الطريقة الأولى، استعملت 4 كلغ برتقال خاص بالعصير بشرت الطبقة البرتقالية وحطيتها في وعاء واسع ضفت عليه السكر وخلطت الكل جيدا.

نقيت البرتقال من الطبقة البيضاء وحاولت نتخلص من الخيوك البيضاء والعلف وقطعتو قطع عشوائية ورحيتو بالبلاندر جيدا فرغت العصير فوق السكر بنفس الطريقة حتى كملت كل كمية البرتقال اللي عندي (طريقة سهلة وما تديش وقت).

خليتو 4 سوايع مرة على مرة نميكسي الكل جيدا حتى ذاب السكر تماما وخليتو بلا ما صفيتو هذاك المبشور يمدلو نكهة مميزة وقوية لمركز البرتقال

فرغت الكمية اللي تحصلت عليها فوق مركز البرتقال الأول اللي كان عندي في المجمد وغطيتو ببابي فيلم ثم غطاء العلبة ودخلتو للمجمد لوقت التقديم.

وعند الأستهلاك نفرغ مقدار كاس واحد من مركز البرتقال ونضيف عليه من 4 كيسان إلى 4 كيسان ونص ماء ونحرك مليح مليح.
نصيحة: ✨إضافة الماء يكون حسب كثافة العصير اللي راكم حابينها يا ثقيل أو خفيف.

ويشرب إما هكذا بدون إضافات أو بإضافة أي نوع من الفواكه (مثل المزو أو التفاح وحتى الجــزر) يعــزز الذوق ويجي بزاف بنين😋👌🏻🥰.