في قدرة نضع كل من البصلة والطماطم والثوم مرحيين، نضيف ملعقة كبيرة طماطم مصبرة، ملعقة صغيرة هريسة، 2 ملاعق كبيرة زيت، التوابل (ملح، فلفل أسود، فلفل أحمر حلو وحار، راس الحانوت)، قطع الدجاج، 3 حبات جزر

نخلط كل شيء مع بعض، من بعد نضيف القليل من الماء، نخلو المرق تاعنا فوق النار تتقلى

من جهة أخرى، في قصعة نضع كأس شخشوخة، نضيفلها قطرات من الزيت، نحلها بين يديا، مبعد نضيفلها رشة ملح

بعدما تقلات المرقة نضيفلها لتر إلا ربع ماء يكون ساخن، نخلو حتى تغلي المرقة، نضيفلها 2 حبات بطاطا، تقدري تضيفي الجريوات (الكوسا)

من بعد نبدأ نفور الشخشوخة، نحط الشخشوخة في كسكاس باه تتفور، بعدما تتفور، نعاود نحطها في القصعة، نحلها بيدي (ولا بملعقة خشب في حالة ما اذا ما تتحمليش السخانة)، مبعد نرشها بالماء، نخلوها مدة ترتاح وتتشرب الماء لي سقيناها بيه، من بعد نعاودو نحطوها في الكسكاس باه تتفور للمرة الثانية (نعاودو عملية التفوار 3 مرات، حتى تتفور مليح الشخشوخة)

كي تقرب المرقة تطيب اي تستوي، نضيفلها فلفل حار

بعدما تطيب اي تستوي المرقة تاعنا، وتتفور الشخشوخة، نحيو الخضر والدجاج من المرق، ونضيفو الشخشوخة للمرق تاعنا (تتجمر)، ضفتلها أيضا ملعقة زبدة (تجي بنينة)

حمرت الخضر والدجاج، زينتهم فوق الشخشوخة لي قدمتها في صحن

النتيجة النهائية بالصحة والهناء ❤❤❤