لسلق المعكرونة نغلي ماء على النار واول ما تغلى نحط الملح والزيت وبعدين المعكرونة اي نوع تفضليه ونقلبها من وقت للتانى وبعد ماتستوى نصفيها ونشطفها بالماء كويس

لعمل الكفتة نبشر البصل ونحطه في بولة بالماء بتاعته ونحط عليه اللحمة والملح والفلفل الأسود ونعجنهم كويس ونعملها كور ونحطها في صينية بدون اي مواد دهنية او ماء على نار هادية جداً لحد ماتنزل الماء إللى فيها وتستوى كويس

لعمل الصلصة نخرط البصلة صغير ونشوحها في الزيت لحد ما تأخذ لون اصفر غامق ننزل بعصير الطماطم والبهارات ونسيبها تتسبك كويس

نحط بقى الصلصة على المعكرونة ونقلبها كويس وبعدين نحطها في بايركس ونساويها ونحط عليها الكفتة وندخل الكفتة شوية جوا المعكرونة وبعدين نحط الجبنة الموتزاريلا على الوجه بس مش نجبها على الكفتة وندخلها الفرن على الرف الأوسط ويكون سخن من قبلها على أعلى درجة حرارة لحد ما الجبنة تسيح نطفى الفرن ونشغل الشواية تأخذ لون ذهبي حلو وبالهنا والشفا