انا بحب اركز الطماطم على النار من غير اى اضافات بس الاكيد انى احطلها ملعقة سكر

الرز حاولى تجيبيه رز يكون نوع نضيف علشان ماتغسليهوش ويكون مغسول جاهز وعدم غسيل الرز بيفرق فغلا فى لذاذة وطعامة المحشى بس لو عندك رز عادى لازم يتغسل يبقى توكلى على الله واستخدميه

هتجيبى البصل وتحطى على توابل المحشى بمافيهم معلقة القهوة وماتستغربيش بس والله بتحلى الخلطة من غير ماتبان وافركى بايدك كويس اوى علشان يبقى كده رز ولا فى الاحلام

ورق العنب انا بخزنه بطريقتين اما بكبسه فى كيس وعالفريزر او بلفه رول وعالفريزر طبعا مابغسله وبنشفه كويس من المية

ولما بيطلع مش بيكون محتاج ابدا انى احطه فى مية مغلية هو مجرد ما بيفك من التلج بشتغل فيه واهو باين قدامكم طازة ولونه يفتح النفس

دلوقتى هنحشى بقى وانا بحب المقاس الصغنن ده علشان الصباع بيكون محندق كده وكيوت بس اكبر من كده بشوبة بقطع الورقة نصين

ايوة كده بالظبط الصباع بيبقى شيك اوى ويشرفك فى العزومات

وهنرصه بقى فى الحلة ولو عندك شوربة كوراع خدى منها وعليها معلقة صلصة واسقيه لحد الصف اللى قبل الاخير وحطى على وشه طبق وحطيه عالنار ولما يغلى هدى عليه اوى كانك بتسوى رز نص ساعة واطمنى عليه وفى التقديم عصرة لمونة بقى ياسلام سلم ونصيحة منى قدميه مع طبق سلطة زبادى بالخيار ولفت مخلل وكلى وادعيلى وبالهنا والشفا