أولا كده هتجيبى الكوارع وتغسليها كويس وتنقعيها في ماء فيها ملح وخل ودقيق وتسيبيها على قد ماتقدرى وبعدين تشطفيها وبعدين تديها دعكة بعصير ليمون وماتدعكيهاش واما تشتغلى فيها او تحطيها في الفريزر انا ماصورتش الخطوة دى علشان كانت عندي في الفريزر

طلعتها تفك شوية وبعدين هتعمليها بطريقة لا يمكن ابدا تلاقيلها اي ريحة وانتى بتاكليها هتحسى انك بتاكلى لحمة

هتحطيهم على النار لحد ما الحلة تغلى غلوة كويسة وطبعا هتشمى ريحة الخل بالزفارة اللي طلعت كلها هي ريحة غريبة ماتقلقيش اوعدك اننا بنشد كل الزفارة بتاعة الكوارع في المرحلة دى

حطينا هنا البهارات وهنفرم البصلتين ونحطلهم حبة ملح صغننين وفلفل اسود مجروش طازجة وادعكيهم ببعض وبصراحة بستغرب من اللي بيحط بصلة صحيحة ولا ارباع مع اللحمة ماجربوش يفركوا البصلة بايدهم ويطلعوا ماء البصلة كده بتخلى الشوربة حكاية مش قادرة اوصفلكم

في ناس زينا بنحبها بشوربتها وفي ناس بتدهنها صلصة وتحمرها او تدخلها الفرن اللي تحبيه بس الشتا بيحب الشوربة وتعالى بقى نعمل شوربة البصل من غير لاتوم ولا خل

هتقطعى البصلة بالطريقة اللي تريحك وتحمريها في سمنة وعليها فلفل اسود مجروش طازجة وده بيفرق جداً في الطعم انا بدقه في الهون وبمجرد ما البصلة تذبل انزلى عليها بالشوربة هتغلى وعليها شوية صلصة طماطم وتقومى تنزلى بيها على عيش او رقاق انا اولادى بيحبوا الفتة بالطريقة دى زي ما متعودين عليها ومش بيحبوا ام ثوم وخل بصراحة دى تكسب

وادى رقاق بيتي محترم وادى الرز بعمله ببصلة واسقيه بشوربة الكوارع والصلصة ببصلة وتومة كمان ويلا ركبى مكونات الفتة بقى وقدميها لعيلتك وبالف هنا وشفا