في مقلات نضع قليل من زيت نضيف بصل مقطع مكبات وثوم مرابي ونحرك نضيف جزر وكورجات نكونو ربيناهم رقاق ونخليهم يطيبو ممبعد نضيف كرم لي نكونو قطعناه حتى هو رقيق ونحرك في الأخير نضيف فلفل أخضر حار ونضيف توابل ومعدنوس نخليهم يتقلاو شوي ونطفي عليهم

نروحو للعجينة في اناء نفرغ لحليب يكون دافئ وزيت وبياض بيضة وملح وسكر وخميرة الخبز ونخلط نضيف الكاس الأول ومبعد نضيف باكي خميرة ونضيف باقي الفرينة حتى نتحصل على عجينة طرية في الأخير نضيف ملعقة زبدة ونلم العجينة نخليها حتى تخمر ويضاعف حجمها

نوجدو اصابع الدجاج في طبسي نضيف بصل مقطع مكبات وثوم مرابي ونضيف صدر دجاج لي يكون مرحي ملح وفلفل ومعدنوس وبيضة ونحرك بيدي نشكل اصابع ونقليهم في مقلات حتى نتحصل على لون ذهبي

نحل العجينة على شكل مستطيل نضع الحشوة في الوسط جيهة نقطها شرائط والنصف الثاني نخليه عادي نضع نصف عادي فوق الحشوة والنصف لي يكون مقطع شرائط نشكل من كل زوج اشرطةضفيرة نحطها فوق العجينة حتى نكمل كل الاشرطة ندهن بخليط صفار حبة بيض وقهوة من الفوق ونزينها بسانوج وجلجلان وندخلها للفور طيب الفور يكون شاعل من قبل متديش وقت في طياب كي طيب من لتحت نحمرها من الفوق

هنا شطتلي شوي عجين درتهم حبات سوفلي وحشيتهم بنفس الحشو زدتلهم فرماج فقط