نحط الفرينة في إناء ونسخن سمن يولي ذايب ونديره في الفرينة ونبسس بشوية لمدة خمس دقائق ومبعد ندير كاس ماء فيه ماء زهر ونعجن بيه مليح ومبعد نخلي العجينة ترتاح

نطيب الكاوكاو تطييب خفيف نرحيه ونضيفله السكر كل كيلو كاوكاو (فول سوداني) نديرله رطل سكر وندير الفانيليا ونزيد القرفة ولقرنفل مرحيين ندير رشة فقط ونديرلهم الماء حسب الحاجة حتى نشوف مكونات شادة روحها

بعدها نقسم العجينة الى 14كرية صغيرة نحل كل وحدة وندير نشاء مابين كل وحدة ولخرى باه تجي مورقة نديرو سبعة لفوق وندهن السنيوة ونحطهم ونحط فوقهم الحشو ومبعد نكمل السبعة التاليين نقسم الخبزة ونديرلها وريدات بالطابع ونحطهم لفوق ونحط فوقهم حبات كاكاو نيين ونطيبها من تحت مدة 15دقيقة الى20دقيقة وبعدها نطيب لفوق كي تحمر نخرجها ونسقيها بالعسيلة ونخليها تبات ليلة كاملة معسلة والف عافية