نخدو كسرول نحط فيها الماء يسخن مليح كي يسخن نرميلو الماقارون ونديرلها شوية تاع الزيت والملح ونخليها الطيب

نرحو صدر الدجاج ونحطو في مقلات يتقلا ندير شوية تاع الزيت مع البصل والتوابل ونقليهم

كي يتقلاو نعودو نولو للمقارون ندهن المول مليح بالزبدة ونحط شوية مقارون ونرميلو شوية بيشاميل ونخلطو بملعقة مليح ثم نزيدلو هاداك الدجاج لي قليتو ونزيد نغطيه بلابيشاميل و نسكرفجلو الجبن المبشور ونحطو يطيب في الكوشة وشهية طيبة

التحلية

في كسرول نحط الحليب والماءونزيدلو الفاني والسكر والنشاء ونخلطو بالفوي مليح ثم نحطو فوق النار ونخلط حتى يثقال الخليط

كي يطيب و هو سخون نضيفلو المنكهات لي خترتهم ثم نبدى نعمر فيهم بالكؤوس في كل طبقة نحط بيسكويت وطبقة من ذاك الخليط حتى نكمل كامل الكؤوس ونزينهم بشوية تاع الكاوكاو والتزيين إختياري و شهية طيبة حبيباتي نتمنى تكون عجبتكم بزاف وماتنساوش تدعوا لأمي الغالية والحبيبة بالرحمة والمغفرة وربي يبعد علينا هاد البلاء