لتحضير الجينواز حطي البيض الى يكون بدرجة حراره المطبخ مع قبسة ملح والفانيلا والسكر وطلعيهم حتى تشوفيه رجع ابيض باه تعرفيه طلع ديري اصبع في الخليط اذا لصق في اصبعك معنتها طلع واذا قطر معنتها مازال خصك تضربيهم بالخلاط الكهربائي ولا ماكانش عندك خلاط كهربائي كان عندك غير يدوي ديري إناء الى فيه الخليط تحته حمام مائي وخلطي بيدك

ضيفي الفرينة وخميرة الحلوى بالتدريج وخلطيها مع الخليط سخني الفرن على درجة حرارة مرتفعة

سرحي في صينية الى راح طيبي فيه ورق طهي وصبي الخليط فيه الاحسن تكون صينية متوسطة الحجم باه تطلعلك جينواز وتقدري تحليها على زوج

ديري نار متوسطة من تحت ومن فوق وخليها طيب مدة 10 دقائق

حضري سيرو الى تشربي بيها جينواز بكاس ونصف سكر مع 3كيسان ماء وخليه يغلي كي يبدا يغلي حسبيله 8د وطفي عليه

لتحضير كريمة باتسيير ديري الحليب مع نشاء او الفرينة والسكر في كاصرونة وقعدي تخلي بالفووي على نار متوسطة حتى تعقد ونحيها وضيفي عطر فانيليا

طلعي لاكريم شانتيه بكاس الا أصبع حليب بااارد مع بودرة شانتيه بعدما تطلع خوذي شوي منها وضيفيلو ملون أخضر حتى تتحصلي على لون الى في صورة

بعدما حضرتي كل المطلوب جيبي الجينواز وحليها على زوج شربي طرف الاول بسيرو الى حضرتيه مليح وحطي فوقها كريمة باتسيير وزعيها بشكل متساوي بعد حطي فوقها طرف ثاني من جينواز شربيه هو الاخر مليح بسيرو وديري عليها كريمة شانتيه دخليها للمجمد وحد نصف ساعة

حضري القناش خوذي كريمة طازجة حطيها تغلي نحيها من نار وضيفيلها شوكولاته البيضاء

خرجي تورتة نتاعك ووزعي عليها القناش بعدما يكون برد شوي ورجعيها مرة أخرى تبرد مليح

بعدما تبرد مليح في مجمد خرجيها وديريلها هدوك وريدات بجيب الحلواني

يبق التزيين اختياري انا درت الفاكهة وكيما حبيتي وحسب المتوفر عندك. وبالصحة والراحة حبيبات قلبي