بعد ما ارتاحت العجينة نبدا ندلك فيها وهي يابسة حتى تطرا شوي ونولي نزيد في الماء بالشوي وندلك مليح كي يدخل فيها الماء مليح نزيد بالشوي بالشوي حتى تولي طرية وتطرطق كيما نقولوها ثم تكون واجدة، نديرها كويرات صغيرة وندهنها مليح بالزيت ونغطيها بكيس بلاستيكي ونخليها ترتاح من نصف ساعة حتى لساعة او اكثر، كل ما تريح تساعدك في الخدمة.

كي ترتاح لعجينة نبدا ندير الزيت فوق طاولة العمل ونطرح الكويرة شوي ومن بعد نكسلها مليح ونطيبها على طاجين حديد والنار ناقصة. نطيب حبيبات من بعد نولي نكسل الكويرة على الطاولة ونحط فوقها نصف من الكويرة الي طيبناها قبل ونحط فوقها الحشو ونطبق العجينة عليها حتى تتغطى ونطيبها. نعمل نفس الشي مع الكويرات لخرين وكل مرة نصب شوي زيت فوق طاولة العمل.