نبدا اولا بتحضير المكونات ونجيب صحن نحط فيه المكونات الجافة كلها ونخلطها مليح ثم نضيف الزيت والخل ونخلط مليح

نبدا نضيف الحليب الكاس الاول ونلم العجين ونزيد الثاني حتى نتحصل على عجينة طرية نخلطها مليح ونعجنها مدة 10دو نخليها تختمر

بعد مااختمرت نكسرلها الخمور ونرش على طاولة العمل النشاء ونبدا نحل العجينة تاعي رقيقة ومن بعد نذوب الزبدة تاعي قليلا ونحطها فوق العجينة ونحلها بالملعقة عليها كاملة

نرش فوق الزبدة القليل من النشاء ونبدا نلف العجينة ونسويها في كل لفة مليح ونطريها كيما العجينة المورقة

نغلق العجينة تاعي بورق شفاف ونحتفظ بيها مدة نصف ساعة فالثلاجة وبعد مرور نصف ساعة نخرجها ونعاود نرش طاولة العمل بالنشاء ونحل العجينة تاعي

نبدا نشكل حبات البتي بان تاعي ونحط م ص شكولا الطلي على جنب ونبدا نلف الحبة حتى نكمل كامل الكمية ونطليها بصفار البيض ونخليها تختمر مدة ربع ساعة ثم ندخلو الفرن يطيب من تحت ثم نشعلولو من فوق

فالاخير هذا شكل البتي بان تاعي وباقي العجينة كملتها بريوش رولي حشيتو بشكولا قطع جاو بنان وخفاف ومورقين دون زبدة توريق