نبدا اولا بتحضير الحشو نقطع حبة البصل وحبات الفلفل الي قطع ثم نجيب مقلاة نحط فيها زيت ونحط عليه البصل ونخليه يتقلى شويا ثم نضيف عليه الفلفل الحلو ونحط ملح وم ص زنجبيل و م ص عكري حلو و م ص فلفل اسود ونخلي الكل يتقلى مليح ثم نقطع قطعة الدجاج الي قطع صغار ونضيفها فالمقلاة ونقص عالنار ونخلي الكل يطيب

بعد ذلك نجيب سلق ونضيفو فالمقلاة ونخليه يذبل ونجيب مقلاة اخرى نحط بها زيت ونقلي البطاطا تاعي الى قطع صغيرة وبعد ماقليتها نضيفها عالحشو الاول ونضيف الزيتون الاخضر وكمية مليحة من المعدنوس المقطع

الخطوة التالية نحضر العجين نحط الماء والحليب دافيين ونضيف السكر والخميرة ونخلط ونحط الزيت ونبدا نضيف فالفرينة مع م ك ملح ونلم العجينة تاعي ونخليها تختمر

بعد مااختمرت نكسرها الخمور ونقسم العجينة على اثنين نرش الطاولة بالفرينة ونحل العجينة الاولة مليح ونجيب سينية الفرن ندهنها بالزيت ونفرش فيها العجينة الاولة ثم نجيب الحشو تاعي ونفرغو فوق العجينة ونحط جبن مثلثات ونزيد نحل العجينة الثانية ونحملها ونحطها فوق الحشو ونغلق مليح ونقص الزايد

نجيب صفار بيض نخفقها وندهن بيها العجينة من فوق ونرش عليها سانوج وندخلها الفرن تطيب من تحت ثم نشعللها تطيب من فوق حتى تتحمر ونخرجها من الفرن

اخيرا نخليها تبرد ونقسمها الى مربعات ونقدمها للعشاء