نبدا اولا بتحضير الحشو نقطع المكونات لي عندي ونرحي اللحم تاعي

نجيب مقلاة نحطها فيها زيت ونحطها على النار ونضيف البصل ونخليه يتقلى ثم نحط عليه اللحم المرحي والملح والفلفل الاسود وسنات ثوم ونضيف بعد ذلك السلق ونخلي الكل يتقلى مليح حتى يطيب الحشو تاعي

الخطوة التالية نحضر العجينة نجيب صحن زجاجي نحط فيه الحليب وحبات البيض والملح ونخلط ونبدا باضافة الفرينة تدريجيا حتى نتحصل على عجينة طرية نوعا ما نغطيها ونخليها ترتاح

بعد مارتاحت العجينة تاعي حوالي ساعة نرجع نشكلها كرات انا شكلها الى كريتين لكن يفضل الى 3كرات احسن وندهنهم بالزيت من فوق ثم نرجع نحط في صحنين زبدة ذايبة وصحن اخر فيه قليل من الزيت نرش طاولة العمل تاعي بالزيت ونبدا نحل فالكرة الاولى من تحت الزيت وفوق العجينة زبدة ذايبة ونحلها كيما المسمن رقيقة ثم نجيب كمية مليحة من الحشو ونحطها عالعجين

بعد ماحطيت الحشو تاعي على جنب نبدا نغلق العجين تاعي مليح ونلويه على شكل حربوش طويل ونجيب سينية ندهنها بالزيت ونبدا نلوي الحربوش الاول ونرجع نحل الكرية الثانية تاع العجين بنفس الطريقة ونرجع نلويها على الحربوش الاول وهكا نشكل شكل المحنشة تاعي وندهنها من فوق بصفار البيض وندخلها الفرن تطيب

فالاخير نخرج المحنشة تاعي ونخليها تبرد ونقدمها ونقطعها حسب الرغبة