في اناء تحطي صفار البيض والماء والملح والخل والفاني وتخلطي مليح بالخلاط اليدوي ومن بعد زيدي الزبدة وشوي فرينة باه تخلطي بيها الزبدة ونخلطوها مليح ومن بعد نزيدو الفرينة المغربلة والخميرة  وندخلهم مليح حتى نحصل على عجينة طرية ونغطيها بنيلو ونخليها ترتاح على الاقل 30 دقيقة ولا تحبي تخبيها اكثر جي احسن واحسن

من بعد نديرلها النشا ونطرحها ونطبقها مرتين باه تتورق وكاينين لي ميطبقوهاش يخليوها هكذاك انا نورقها خير نطبقها على الجهتين ونزيد نطرحها بالنشا ونزيد نطبقها ومن بعد نطرحها لازم تكون رقيقة ولا متصلحش لازم ترقيها بزاف وتقطعيها دوائر بالطابع يكون مشرشف ماشي العادي وتحكمي دائرة وتدهني فوقها خط ببياض البيض خط في النص ونحط فوقها الثانية ونزيد ندير البياض ونحط الثالثة ونكمل حتى لسادسة منحطش فوقها البياض نحكم كاش حاجة رقيقة انا نخدم بعود الشواء تاع الحطب ونضغط مليح ماشي حتى تتقسم طول وتخليها بجيه وتغطيها

وتزيدي تخدمي الحبات لخرين كما هاذي وتحطيهم يتقلاو في الزيت لازم يكون غارق ديري حاجة صغيرة باه جيك الحبات غارقة فيه وطيبي بالوحدة وحركيها من كل جيهة باه تتنفخ وتتورق وتمدلك شكل مليح وزيدي طيبي لخرين لازم ديري بكميات صغيرة على خاطر كان طولي عليها تلصق دوائر فبعضاها، الزيت ملازمش يكون بارد ومالازمش يكون ساخن بزاف تفسدلك يكون مليح برك ولازم الدوائر تكون رقيقة باه تصلحلك كان ديريها خشينة يفسد الشكل ولا تتحلك في الزيت

كي تكملي كامل الحبات عسليهم ورشي عليهم الجلجلانية

وبالصحة والعافية😊