نبدا اولا بتحضير المرق نحط قطع الصدر في طنجرة ونحط عليهم بصل وثوم مرحيبن مع معدنوس مقطع رقيق وملح وفلفل اسود وزنجبيل وم م زيت ونحطها عالنار تتقلى مليح ثم نضيف حبة طماطم مرحية ونقلي مليح ونرجع للوبيا ماشطو نقيها ونغسلها مليح

نوجد حبة البطاطا ونقصها مربعات صغار ثم نرجع للمرق تاعي نضيف اللوبيا ماشطو ونقلي مليح ثم نحط م ك طماطم مصبرة ونقلي ثم نمرق بالماء ونخليها تطيب

الخطوة التالية نقلي البطاطا تاعي ونحتفظ بيها ثم نرجع نفتح عالمرق بعد ماطاب ونخلي كمية مرق قليلة وتكون ثقيلة نحط البطاطا في كسرونة ونضيف عليها اللوبيا ماشطو ونخلط مليح ثم نضيف معدنوس مقطع

نرجع نفتت اللحم تاعي ونحطو عالبطاطا واللوبيا ونخلطو مليح ثم نجيب مول يدخل الفرن نفرغ كمية من المرق ونفرغ الخليط تاعي ونسويه مليح ثم نجيب كاس كريمة فراش وحبة بيض ونخلطو مليح ونفرغو عالخليط ثم نحط جبن مبشور وندخلو الفرن يطيب

فالاخير نخرج الطبق تاعي ونقدمو في صحن التقديم جات بنينة بزااااف