بنظف الدجاج بالليمون والملح والطحين وبسطحو بالسكين وبغسله وبصفيه
بقطع راسين بصل وبحط بالطنجره زيت وشوية سمنه اذا مش موجود سمنه عادي بس بتعطي طعم زاكي وبخليه البصل يذبل بضيف ورق غار وهيل حب وعودين قرفه واي نوع بهار خشن وبقلبهم بالزيت شوي بعدين بضيف الجاج بخليه يوخذ لون خفيف بعدين بضيف بهارات المقلوبه او البهارات المشكله المطحونة وفلفل اسود مطحون وقرفة مطحونة وهيل مطحون ناعم وشوي كاري حسب الرغبه ومكعب مرقة دجاج وبقلب كلهم مع بعض وبخفف النار وبخليهم عشر دقائق تطلع النكهه

بعدها بضيف ماء مغلية وملعقتين ملح صغار وبسكر عليهم بتركهم لحتى يستوي الدجاج تقريبا نص ساعة...
بالوقت هاد بنقلي الخضار سواء زهره او بطاطا او باذنجان او حسب الموجود وبنقع رز بعد ما ينقع الرز بصفيه وبضيفله ملح فلفل اسود وقرفة مطحونة وبهارات مشكله وبقلبهم سوا

الدجاج بنطلعو وبنصفي المرقه تضل نظيفه يعني ما فيها اشي
بكون قاليه الخضار بزيت غزير وبصفيهم من الزيت على ورق مطبخ وبرش عليهم كمون
وبقلي الدجاج بنفس الزيت اللي قليت فيه الخضار تحمير خفيف حسب كيف بتحبوه

هسه بالطنجره برش طبقة رز وبعدين الدجاج وبعدين برتب الخضار اول اشي البطاطا بعدها الزهره واخر شي الباذنجان واخر طبقة الرز وبضغطهم بأيدي منيح عشان ما يطلعو لفوق بس نحط الماء بعدها بنضيف مرقة الدجاج وبخليهم على نار عاليه لما تنقص مية الرز واذا حابه زيت اكثر بتضيفي ملعقتين زيت معها من زيت القلي وبخفف الغاز على اخف اشي وبتركه لحتى يستوي تماما.. وصحة وعافية 😍