نبدا بسم الله ونجيب صحن نحط فيه علبة ياؤورت وم ك طماطم مصبرة وملح وفلفل اسود وعكري حلو وزنجبيل وربع كاس زيت وم ك خل ونخلط مليح ثم نحط قطع الدجاج تاعي ونمارينيها مليح ونغطي بورق شفاف ونحتفظ بيها حوالي ساعة

بعد مرور ساعة نجيب مقلاة نفرغ فيها قطع الدجاج مع الماريناد تاعي ونحطها عالنار هادئة ونبقا نقلب كل ربع ساعة ثم نضيف شرائح البصل ونغطيها ونخليه يطيب وكل ربع ساعة نحركو ثم نضيف كاس ونصف ماء ونغطيه ونخليه يطيب

ثالتا نجيب كسرونة ونحط فيها كمية من الماء ونحط م ك ملح وم ص فلفل اسود وم ص كركم وم ك زيت ونحطها عالنار كي يغلي الماء نحط كاس ونصف ارز غسلت من قبل ونشمختو فالماء ونخلي الارز تاعي يطيب ثم نطفي عليه النار ونصفيه في كسكاس ونخليه يقطر مليح وكل ربع ساعة نتفقد الدجاج تاعي

بعد ماطابلي الدجاج راح ينشف من الصوص تاعو نحيه من المقلاة ونجيب صحن تقديم نحط فيه الارز تاعي ونحط قطع الدجاج فوقو ونفرغ فالوسط كمية من المرق كنت نقصتو من الدجاج كي كان يطيب وزينتو بمعدنوس

فالاخيرشكل الطبق تاعي جاء بزااااف بنين