نبدا أولا بتنظيف الفراولة فالاول نستعمل 500غ فقط فراولة نغسلها ونقطرها ثم نقطعها قطع رقيقة ونضيف عليها 3م ك سكر

نغطي الفراولة ونخليها مدة ساعة حتى تطلق هذاك السيرة تاعها ثم نجيب سارسو دائري نحطو فوق ورق خاص بالطارط وفالجوانب نقصلو ورق الطهي على شكلو تماما ثم نفرغ هذاك السيرة لي تحصلت عليه في صحن ونضيف عليه كاس شاربات

نجيب المول تاعي ونجيب لي بودوار ونبدا نستف فيهم على المول كيما فالصورة ونرجع بعد ذلك القاعدة نغطس البودوار في سيرو الفراولة ثم نحطو فالقاعدة حتى نغطيها تماما بعد ذلك نرجع نطلع الكريمة تاعي في صحن نحط 2كاش شانتي باردة مع كاس حليب بارد وكاس كريمة باردة ونطلع الكل مليح حتى يثقال الخليط

بعد ماثقالت الكريمة نضيف عليها 3 علب ياؤورت تورتة فراولة ونفرغهم ونخلط من فوق للتحت ونبدا نحط طبقة مليحة من الكريمة فالقاعدة ثم كمية من الفراز المقطع رقيق ثم نغطي بطريقة من لي بودوار بعد مانغطسهم فالسيرو

خامسا نحط طبقة اخرى من الكريمة وكمية من الفراز ثم طبقة من البودوار وطبقة من الكريمة

ثم طبقة من الفراز وأخيرا طبقة من البودوار مشمخ فالسيرو وطبقة اخيرة من الكريمة ونسويها مليح ونحطها فالثلاجة تتماسك

بعد ذلك نرجع نطيب الطبقة الاخيرة لي نزين بيها طارط تاعي نجيب 200غ فراولة نغسلها ونقطعها قطع صغيرة نحط في كسرونة ونضيف عليها 2م ك سكر و3م ك ماء ونحطها عالنار حتى تغلي وكي تبدا تثقال نطفي النار ونخليها تبرد ثم نمكسيها بالبرا ميكسار ونصفيها من الحبيبات

بعد ماصفيت الفراولة تاعي نضيف عليها علبة فلان فراولة ونحطها عالنار حتى تغلي ونطفي ونبقا نبرد فيها بالفويي حتى مايثقالش الفلان ونجيب الطارط تاعي من الثلاجةونفرغ عليها خليط الفراز تاعي ونحطها فالثلاجة حوالي 6ساعات او ليلة كاملة

فالاخير بعدمابقات ليلة كاملة نخرجها ونزينها بحبات فراولة ثم نحاول نحي السارسو تاعي بلطف وورق الطهي حتى تحافظ الكارطة على شكلها ونزينها يخيط احمر اختياري