نبدا بسم الله ونحضر الجينواز تاعي نجيب 2ريسبسبون ونجيب البيض ونفصل الصفار عن البياض نحط فالاول البياض ونضيف عليه رشة ملح ونبدا نطلع فيه حتى يبياض ونجيب نصف كمية السكر تاعي ونضيفها عالبياض ونبدا نخفق حتى نتحصل على ميرانق

نرجع للرسبسيون 2نحط فيه 6صفار مع نصف م ك كبيرة فانيلا ونصف كاس السكر المتبقي ونخلط مليح حتى يبياض الخليط ثم نسخن 4م ك كبار حد الغليان ونصيفهم عالخليط وانا نخلط بالباتور ثم نبدا نضيف البياض بالكمية ونخلط من فوق للتحت ونبقا نخلط مرة فرينة ومرة رياضة البيض حتى نكمل كامل الكمية

بعد ذلك نضيف الكاكاو و8غ خميرة الحلويات ونواصل الخلط ونبقا نخلط من فوق للتحت تحت يندمجو المكونات ثم نجيب سارسو دائري ونحطو في سينية فوقها ورق الطهي وندهن السارسو بالزبدة ونرشو بالفرينة ونفرغ خليط الجينواز فالسارسو ويكون الفرن مسخن مسبقا ونحط فيه السينية تطيب وكل وحدة والفرن تاعها في درجة الطهي

نخرج السينية من الفرن بعد ماطابلي ونفوت سكين عالحواش ونحب السارسو تاعي ونحط الكيك فوق طرشونة ونخليه يبرد تماما ونجيب ورق شفاف ونغلف الكريمة تاعي ونحطها فالثلاجة مدة نصف يوم او اكثر

بعد مرور نصف يوم نخرج الجينواز من الثلاجة ونحيلها الورق الشفاف ونجيب سكين منشاري ونقسمها على 3اجزاء ثم نرجع في كسرنة نحط 2كاس حليب مع 3م ك نشاء و2م ك كاكاو بني نوعيةجيدة و4م ك سكر ونخلط بارد في بارد ونحطها فوق النار حتى تثقال

نطفي النار عليها ونفرغها مباشرة في صحن ونغلفها بورق شفاف يلامس السطح تاعها وندخلها المجمد تبرد مليح ونجيب ريسبسيون نحط كاس شانتي مع كاس ناقص إصبع حليب بارد جدا ونبدا نطلع فيها مليح

بعد ماطلعت الشانتي نبدا نضيف لها تدريجيا الكريمة ونخلط مليح حتى نكمل كامل الكريمة وراح نتحصل على موس هايلة

نرجع نحضر الكيكة نجيب السارسو تاعي ونحط الورق من تحت ونحط كمية قليلة من الكريمة فالوسط نثبت بيها القطعة الاولى من الجينواز نحط القطعة الاولى ونشربها بعصير البرتقال او شاربات نحضرها ونجيب كمية من الكريمة نحطها فلابوش ونعمر فوق الجينواز ثم نحط معجون الفراولة او أي فاكهة متوفرة عندكم فوق نحط الطبقة2من الجينواز ونشربها ونحطوكمية من الكريمة

ونحط فوق الطبقة الثانية كمية من المعجون ونحط الطبقة 3تاع الجينواز ونشربها مليح ثم نحط كمية مليحة من الكريمة ونسويها بالسباتيلا مليح وندخلها المجمد ليلة كاملة

فالصباح خرج الكيك تاعي من المجمد ونخليه يرجع بحرارة الغرفة وونزع السارسو تاعي ثم نحضر القاناش تاعي نجيب كسرونة نحط فيها 250غ كريمة سائلة نحطها عالنار تسخن مليح ثم نضيف لها 259غ شكولا منى ونخلط مليح حتى تذوب مليح

نجيب القاناش تاعي ونفرغو عالتارت ونبدا نشويه بسباتيلا بسرعة ونفيني الجوانب مليح ونرجعها الثلاجة ثم نرجع الكمية لي بقاتلي نحطها فالمجمد حتى تجمد مليح ثم تخرجنا ونخلطها بالباتور

نجيب اي نوع من لادوي متوفر ونركبو في بوش ونخدم وريدات كيما فالصورة والتزيتن اختياري كانت هذي كيكة عيد ميلادي 17جوان