نبدا بسم الله ونحط في ريسبسيون الفرينة ونحط عليها م ك خميرة الخبز وم ك سكر وم ص ملح ثم نخلط المكونات الجافة ثم نحط عليها ربع كاس زيت ونخلط مليح ثم نبدا نضيف فالحليب يكون دافئ ونلم العجينة تاعي

بعد ماتلمت ندلكها حوالي 5د ونلمها ونغطيها بورق شفاف تختمر ثم نجيب نقطع البصلة الى قطع صغيرة ونرحي سنات الثوم

نجيب مقلاة نحط فيها م ك زيت ونحطها عالنار تغلي ثم نحط البصل والثوم ونخليهم يتقلو ثم نضيف الفلفل حلو مقطع ونحط الملح والعكري حلو وراس الحانوت ونقلي مليح ونحط م ك طماطم مصبرة انا ضفت قطعة من صدر دجاج اختياري ونغطي ونخلي الكل يطيبو مليح حتى ينشف الخليط من السوائل

نرجع العجينة بعد مااختمرت نهبطلها الخمور وندلكها شويا على سطح العمل ثم نقسمها على اثنين ونطفي عالحشو بعد ماطاب

بعد ذلك نوجد جبن مثلثات وجبن مبشور وزيتون اخضر مقطع و2حبات بيض مسلوقين ونبدا نحل الكرة الاولى

نحل الكرة الاولى رقيقة ثم نحط فالوسط كمية من الحشو ثم حبة بيض مسلوقة ثم زيتون مقطع ثم حبات جبن مثلثات كيما فالصورة ثم نحط جبن مبشور

نبدا نغلق الحبة تاعي كيما فالصورة ونطوي الاطراف ونغلق مليح ةنشكلها حربوش ونكمل العجينة الثانية بنفس الطريقة نجيب ورق طهي نحطو في سينية ونحط الحربوش تاعي

نجيب سكين ونشكلها مثلثات دون مانقطع العجينة ندهنها ببيضة ونرش عليها سينوج وندخلها الفرن يكون ساخن من قبل تطيب من تحت ثم نشعللها

تطيب من فوق حتى تتحمر ونخرجها ونخليها تبرد

فالاخير نخرج المملحة تاعي ونحطها على لوحة نقطيع نخليها تبرد ثم نجيب سكين منشاري ونقطع المثلثات وهذا شكلها النهائي جات بزااااف بنينة وخفيفة كي القطن قدمتها مع حساء الخضار