نبدا بسم الله ونقطع دجاج تاعي الى مربعات صغيرة ونجيب مقلاة نحط فيها م ك زيت وم ك زبدة ونحطها عالنار ونحط عليها دجاج المقطع ونحط عليه ملح وفلفل اسود وتوابل شاورما ونقليه مليح ثم نقشر 2حبات بطاطا صغيرة نفسها مربعات ونحطها في كسرونة نضيف عليها الماء وموص ملح ونحطها تغلي حتى تطيب

بعد ماطاب الدجاج نحطو في صحن وفي نفس المقلاة نحط بصلة صغيرة مقطعة رقيقة ونضيف رشة ملح ونخليها تتكرمل ونجيب البطاطا بعد ماطابت نقطرها من الماء مليح ونحطها في صحن ونمعسها بالشوكة مليح

بعد ذلك نحط البصل المكرفل ثم نحط الدجاج تاعي فالاشوار ونرحيه ثم نضيفو عالبطاطا والبصل ونخلط مليح

نجيب صفار بيض. نضيفو عليهم ونعجنها باليد حتى نتحصل على عجينة نلمها ونستعين بالماء ونكورها كرات

بعد ذلك نجيب كل كرة ونحط فيها جبن مثلثات ونغلق ثم نشكلها على شكل مثلث حتى نكمل كامل الكمية ثم نوجد شابلير وفرينة نحط بيضة كاملة والبياض لي بقا ونخلطهم ونبدا نحط بالمثلث فالفرينة

ثم فاابيض مليح ثم فالشابلير ونكون حطيت مقلاة فيها زيت نحطها عالنار تسخن مليح ونحط الحبات مباشرة يتقلاو على نار متوسطة ونقلبهم عالجهتين حتى يتحمرو مليح

شكل المثلثات بعد ماطابو نحطهم فوق ورق ماص الزيت انا عطاتني 12حبة بعد ذلك نجيب جبن شرائح ونحط نقيس على المثلث ثم نجيب الاعواد الخاصة بسوسات قلاصي ونلصقها فالحبات

بعد ذلك نجيب قطاعة صغيرة وبايات ونشكل دوائر كيما فالصورة ونلصقها على المملحة تاعي بعد ماتكون بردت حتى نكمل كامل الحبات

فالاخير شكل المملحة تاعي جات هايلة قدمتها مع شربة فريك زينتها بشرائح ليمون ومايزنيز وحبات زيتون اسود