نبدا بسم الله ونجيب ريسبسيون نحط فيها كاس ونصف ماء دافئ ونضيف م ك خميرة الخبز وم ك سكر ونخلط مليح ونغطي ونخليها تختمر مدة 10 د بعد مااختمرت نضيف عليها 4م ك زيت وبياض بيضة ونخلط

نبدا نضيف فالفرينة بالكاس ونحط م ص ملح ونلم العجينة انا هزت معايا 4كاس فرينة نلمها ونحطها على سطح العمل ونحط م ك زبدة ندخلها مليح فالعجينة ونلمها ونرجعها فالرسبييون وونغطيها ونخليها تختمر مليح

بعد مااختمرت مليح نرش سطح العمل ونقطعها الى كرات انا عطاني 11كرة صغيرة نكورهم ونخليهم على جنب

نبدا نحل بالكرة ونحط كمية مليحة من الجبن الطري انا استعملت موندور ونغلق ونشكلها كرات ونحطها فوق ورق الطهي حتى نكمل كامل العجينة ثم نرجع نبسطهم كيما فالصورة

نجيب صفار بيضة نحط عليه قليل من الحليب وندهن الخبيزات تاعي ثم نجيب زيتون اخضر مقطع وزيتون اسود ونزينهم كيما فالصورة ونرش عليهم سينوج ونشعل الفرن وندخلهم يطيبو من تحت ثم نشعل لهم من فوق يتحمرو ونخرجهم من الفرن ونفطيهم بطرشونة

فالاخير شكل خبيزات الزيتون والجبن جاو خفاف وهايلين يتقدمو مع حساء الخضار