نبدا بسم الله ونجيب جفنة نحط فيها الزبدة والسكر الناعم ونخلط حتى ترجع كريمة ثم نحط 2صفار بيض وجبة كاملة ونخلط ونضيف كاس الا ربع كاوكاو محمص ومرحي وكاس الا ربع نشاء

نبدا نلم ونضيف م ك فانيلا وكيس خميرة الحلوى ونضيف الفرينة تدريجيا

نلم العجينة ونخليها ترتاح ونحضر الحشو تاعي في صحن نحط كاس كاوكاو محمص ومرحي وكاس لوز مرحي وم ك ماء زهر وم ك حلوى الشامية ونخلطهم مليح

نحط معجون المشمش ونبدا نلم الحشو تاعي نغطيه ثم نبدا نشكل الحلوى المعسلة العجينة وزنتها 25غ والحشو 8غ ونشكل كرة من العجينة نحط في وسطها كرة من الحشو ثم نشكلها مليح ثم نجيب بياض البيض

نغطس حبات الحلوى فالبياض بيض ونرمدهم فالكاوكاو المحمص والمرحي خشين نوعا ما ونحط فالسينية مباشرة ونحط حبة كاوكاو في وسط الحبة حتى نكمل كامل الكمية نشعل الفرن يسخن ونحط الحلوى تاعي تطيب من تحت ثم نشعل لها من فوق ونخرجها

مباشرة بعد ماخرجتها نعسلها يكون العسل بارد واذا كان ثقيل نخفوه بماء الزهر ونغطس الحبات فالعسل ونخرجهم ونحطهم يقطرو ثم نحطهم فالنابات والكيسات

فالاخير شكل الحلوى المعسلة جات هشوشة مشوك بحشو البقلاوة