نبدا بسم الله ونحضر صلصة الطماطم نجيب كسرونة نحط فيها حبة طماطم مقطعة ونضيف عليها الملح والفلفل الاسود والعكري الحلو وراس الحانوت وحبة بصل صغيرة و2سنات ثوم مقطعة وم ك زيت ونحطها عالنار تطيب مليح ثم نرجع نجيب رجل عجينة مورقة نقسمو الى اثنين

نرش سطح العمل بالفرينة ونجيب سينية فرن نحل الجزء الاول من العجينة ونحطو فالسينية ونثقبو بشوكة

بعد ماطابت الصلصة نرحيها فالاشوار ونخليها تبرد ونحط كمية منها فوق العجينة

بعد ذلك نحط زيتون اسود مقطع او زيتون اخضر انا ماكانش متوفر عندي زيتون اخضر ونحط جبن طري نوزعو على كامل السطح ثم نحط كمية من المعدنوس المقطع من فوق ونحط فلفل حار مقطع رقيق

ثم نحل الجزء المتبقي من العجينة بنفس الطريقة ونغلقو مليح مع العجينة الاولى ونقطع الزوائد ونجيب حبة بيض نخلطها مليح ونقطع سطح الكوكا بالسكين ثم نطليه بالبيض ونزينو بانصاف حبات زيتون ونشعل الفرن وندخلها تطيب من تحت ثم نشعللها من فوق تطيب وتتحمر مليح

فالاخير نخرجها ونخليها تبرد قليلا ثم نقطعها بسكسن ونقدمها في صحن التقديم انا قدمتها مع عصير الفراولة صنع منزلي جات بزااااف خفيفة ومقرمش.