نبدا بسم الله ونجيب ريسبسيون نحط فيها كاس حليب دافئ ونضيف م ك سكر وم ك خميرة الخبز ونخلط مليح ثم نضيف بياض بيضة و4م ك زيت ونخلط جيدا

نضيف فالاول 2كاس فرينة وم ص ملح و3م ك نشاء ونخلط مليح ونكمل باقي الفرينة حتى نتحصل على عجينة طرية نلمها ونغطيها بورق شفاف ونخليها تختمر

بعد مااختمرت نهبطلها الخمور ونرش طاولة العمل بالفرينة ونحل العجينة على شكل مستطيل

نضيف م ك زبدة ونطليها على كامل العجينة ثم نلفها على شكل حربوش

نطوي العجينة كما فالصورة ونغطيها بورق شفاف ونخليها مدة ربع ساعة ثم نرجع نحل العجينة على شكل مستطيل ونحط عليها 3 م ك سكر بني او عادي

نرش السكر على كامل العجينة ثم نحط كمية مليحة من حبيبات الشكولاتة ونلف العجينة على شكل حربوش ونغلق الحواف مليح

نتحصل على حربوش نجيب خيط ونقطع بيه الحبات تاعي احسن من السكين ونجيب سينية نحط فيها ورق الطهي ونحط حبات البريوش فوقها حتى نكمل كامل العجينة

بعد ذلك نجيب صفار بيضة نضيفلو القليل من الحليب ونطلي الحبات من فوق ومن الجوانب ونخلوهم يخمرو ونشعل الفرن يسخن ونحط البريوش يطيب من تحت ثم نشعلو يتحمر من فوق

فالاخير نخرج البريوش تاعي من الفرن وهو سخون نجيب معجون الكرز ونطلي الحبات تاعي من فوق وهذا شكل البريوش رولي جاي بزااااف خفيف