نبدا بسم الله ونجيب طنجرة نحط فيها افخاذ دجاج نضيف عليهم بصلة مرحية وثوم مرحي ثم نحط ملح وفلفل اسود وكركم وم ص راس الحانوت وعكري حلو وم ك زيت ونقلي مليح ثم نمرق بالماء ونخليها تطيب

نجيب حبة بطاطا نقشرها ونغسلها مليح ونقطعها مربعات ونحطها في كسرونة مع قليل من الملح و نخليها تطيب مليح بعد ماطابت نصفيها من الماء ونحطها في كسكاس ونخرج افخاذ الدجاج بعد ماطابت وننزعلهم الجلدة وهذاك العظم

نجيب صحن ونحط فيه البطاطا ونمعسها بشوكة حتى تصبح ناعمة ثم نحط هذاك اللحم في اشوار ونرحيه ونحط. في صحن ثم نضيف كمية من البطاطا عاللحم ونحط معدنوس مقطع (لازم تكون البطاطا نصف اللحم)

ثم نضيف جبن طري او مثلثات ونخلط الكل مليح حتى نتحصل على عجينة نلمها

نبدا نشكل فالعجينة عاليد ونحط هذاك العظم الخاص بالفخذ فيها ونغلق ونشكلها نفس شكل فخذ الدجاج والكمية لي بقاتلي شكلتها كرات ونحتفظ بيهم فالمجمد نصف ساعة

بعد مرور نصف ساعة نخرجهم ونجيب صحن نحط فيه شابلير واخر نحط فيه حبة بيض وصحن نحط فيه فرينة ونبدا نحط الكرات فالفرينة ثم فالبيض ثم فالشابلير

نجيب مقلاة نحط فيها زيت ونحطها تسخن عالنار ونقلي هذيك الكرات وافخاذ الدجاج

نقلب الافخاذ والكرات حتى يتحمرو من كل الجوانب ونحطهم فوق ورق ماص لحين تقديم الطبق ونطفي عالمرق تاعي بعد ماحطيتلو فلفل حار

فالاخير نسخن المرق ونجيب صحن التقديم نحط فيه كرات الدجاج وافخاذ الدجاج الكاذبة ونحط عليه كمية المرق والحمص وزينتو بمعدنوس مقطع وفلفل حار جاء طبق بزااااف بنين