نبدا بسم الله ونجيب ريسبسيون نحط فيها كاس حليب دافئ مع علبة ياؤورت وربع كاس ماء دافئ وم ك سكر وم ك خميرة الخبز ونخلط مليح ثم نضيف حوالي كاس فرينة ونخلطها مليح و نخليها حوالي 10د

بعد مرور 10د نضيفلها بياض بيضة ونصف كاس زيت ونخلط مليح ونبدا نلم بالفرينة وم ص ملح حتى نتحصل على عجينة طرية نلمها ونغطيها ونخليها تختمر

نحضر الحشو نجيب مقلاة نحط فيها م ك زيت ونحطها عالنار ونضيفلها حوالي حبة بصل مقطعة مربعات ونضيف م ص ملح ونخليها تذبل ثم نحط عليها 2حبات جزر مبشور ونقلي مليح ثم نحط حبة طماطم

نضيف عليهم م ك طماطم مصبرة وم ك عكري حلو وم ص فلفل اسود ونقليهم مليح ونضيف عليهم حوالي كاس ماء و خليهم يطيبو جيدا حتى ينشفو من كامل الماء ونحط عليهم كمية مليحة من الزيتون الاخضر شرائح ثم نرجع العجينة بعد ما اختمرت نهبطلها الخمور ونرش سطح العمل بالفرينة ونقسمها الى 4كرات متساوية نحل الكرة الاولى على شكل مستطيل ونحط كمية من الحشو على كامل العجينة

بعد ذلك نحط كمية مليحة من الجبن طري على كامل الحشو ونغلقها كما فالصورة حتى نكمل كامل الكرات ونحطها على ورق طهي في سينة فرن ونخليها تختمر ثم ندهنهم بصفار بيضة مع حليب ونرش عليهم سينوج وندخلهم الفرن طيبو من تحت ثم نشعل لهم من فوق يتحمرو

نخرجهم بعد ماتحمرو ونطليهم صلصة طماطم ونحط عليهم كمية من الجبن المبشور ونعاود ندخلهم من فوق يذوبلي الجبن ونخرجهم ونزينهم بمعدنوس مقطع وزيتون اسود

فالاخير نخرجهم ونخليهم يبردو ونقطعم الى مربعات ونقدمهم مع شربة او حساء