نبدأ بسم الله ونجيب كمية من لوبيا ماشطو (خضراء) حسب أفراد العائلة نغسلها مليح ونقيها ثم نقطرها ونحطها في إناء نضيف عليها القليل من الملح وشة فلفل اسود ونجيب مقلاة نحط فيها القليل من الزيت ونحطها على النار ثم نضيف اللوبيا ماشطو (خضراء) ونقص النار ونخليها تتقلى مليح ونغطيها لازم

نبقا كل فترة نحي الغطاء ونقلبها حتى تذبل مليح ويتغير لونها ثم نجيب ربع صدر دجاج مرحي ونصف حبة بصل نقطع البصل الى مربعات صغيرة ونقطع المعدنوس

بعد ماطاب اللوبيا نرجعلها فالاناء الاول ثم في نفس المقلاة نحط ربع صدر دجاج مفروم نقليه مليح بالشوكة

بعد ماتقلى نضيف عليه نصف حبة بصل مقطعة ثم نحط المعدنوس والملح وكاري الدجاج وراس الحانوت والزنجبيل والفلفل الاسود ونخلط الكل مليح مع الدجاج ونقص عليه ونخليه يطيب مليح

بعد ماطاب الدجاج نضيف عليه لوبيا ماشطو (خضراء) ونحط حبة طماطم مرحية ونخلط الكل مليح

نجيب 2حبة بطاطا صغيرة نقطعها الى مربعات ونقليها في مقلاة اخرى

بعد ذلك نضيف البطاطا المقلية. على اللوبيا والدجاج ونخلط الكل مع بعض ونطفي النار ثم نجيب مول يدخل الفرن نفرغ فيه الخليط تاعي نسويه مليح كما يمكن نطيبو في المقلاة فقط يجي ثاني بنين

نجيب جبن طري نحطو من فوق ثم نفرغ عليه 2حبات بيض نكون خلطتهم مليح ونفرغهم من فوق ثم نحط كمية من الجبن المبشور ندخلهم الفرن يكون سخون من قبل حتى ينشف البيض ونشعل عليه من فوق يذوبلي الجبن ونخرجو ونقدمو كوجبة للعشاء وزينتو بخطوط من المايونيز