نبدأ بسم الله ونجيب ريسبسيون نحط فيها نصف كاس حليب دافئ ونصف كاس ماء دافئ وعلبة ياغورت بحرارة المطبخ ونخلط مليح ونحط ما ك خميرة الخبز

نخلط مليح ونحط نصف كاس سكر ونخلط ثم نضيف كاس فرينة فالاول ونخلط

نغطيه ونخليه ربع ساعة ثم نرجع نكتبو باقي المكونات نضيف ربع كاس زيت وحبة بيض ونخلط مليح ونضيف الفرينة وم ص ملح

حتى تتلم العجينة نحطها على سطح العمل ونضيفلها ما ك زبدة ندخلها مليح في العجينة ثم نرجعلها الرسبسيون ونغطيها ونخليها تختمر

بعد مااختمرت نحط العجينة على سطح العمل ونقسمها الى 4كرات متساوية نشكلهم ونحطها في صحن ونخليهم مدة 5 دقائق يرتاحو ثم نرش طاولة العمل بالفرينة ونحل الكرة الاولى

نجيب صينية فرن نحط فيها ورق الطبخ ونحط الكرة الاولى ونحط عليها 2 ملعقة ك شوكولاته الطلي ذايبة ثم نخل الكرة الثانية بنفس الطريقة ونحطها فوق الشوكولا ونغلق ونرقق الحواف ونغلقهم كما في الصورة

بعد ماكملت العجينة الاولى نكمل العجينة 3و4 بنفس الطريقة ونتحصل على 2خبزات بريوش كبار ثم نجيب صفار بيضة نضيفلو ما ص قهوة ونطلي البريوش تاعي ونرش عليه جلجلانية ونشعل الفرن ونخليه يسخن ثم ندخل البريوش يطيب من تحت ثم نشعلو يتحمر من فوق ونخرجو مباشرة ندهنو بعسيلة خفيفة او معجون مشمش ونزينو بلوز مرحي

فالاخير نخليه يبرد تماما ونقطعو إلى مثلثات ونقدمو مع قهوة العصر او فطور الصباح