نبدا بسم الله ونجيب ريسبسيون نحط فيه نصف كاس حليب ونصف كاس ماء دافئ وعلبة ياؤورت طبيعي نخطلهم مليح ثم نضيف نصف كاس سكر ونخلط مليح ثم نضيف م ك خميرة الخبز نخلطها مليح

نضيف فالاول كاس فرينة ونخلطها مليح ونغطيها تختمر ربع ساعة

بعد ما اختمرت نحطلها ربع كاس زيت وحبة بيض ونخلطهم مليح ونبدا نضيف فالفرينة حتى نتحصل على عجينة طرية نلمها مليح

بعد ذلك نضيف لها م ك زبدة ندخلها فالعجينة مليح ثم نلمها ونرجعها فالرسبسيون ونغطيها ونخليها تختمر

بعد مااختمرت نحطها على طاولة العمل ونقسم العجينة الى 4قطع نشكلها كرات ثم نبدا نحل الكرة الاول. فوق طاولة العمل ثم نحطها فوق ورق الطهي في سينية فرن

نحل بعد ذلك الكرة الثانية بنفس الطريقة ثم نحط حوالي 3م ك شكولا الطلي فالعجينة الاولى ثم نحط كمية من نواد كوكو ثم نحط العجينة الثانية فوق الشكولا ونغلقها مليح وندخل الحواف من أسفل ونكمل بنفس الطريقة الكرة 3و4 ونجيب حبة بيض نضيفلها م ك قهوة وندهن خبزة البريوش

نشعل الفرن يسخن مليح وندخل البريوش كي يطيب من تحت نشعلو من فوق ياخذ لون ذهبي ونخرجو وهو سخون ندهنو بعسل خفيف ونزينو بنواد كوكو وجلجلان محمص

فالاخير نخلي البريوش تاعي يبرد تماما ونقطعو ال مثلثات