نبدا بسم الله ونجيب كسرونة نحط فيها كاس حليب وم ك ونصف نشاء ونضيف 2م ك ونصف سكر وم ك فانيلا ونخلط بارد في بارد ونحطها عالنار ونبقا نحرك حتى يثقال الخليط

نطفي النار ونفرغو في صحن ونغطيه ببلاستيك يلامس السطح وندخل الكريمة تبرد ثم نجيب حبات من البسكويت نحطها فالاشوار ونضيف عليها حبات لوز وحبات جوزونرحي الكل مع بعض ثم نضيف م ك زبدة ونرحيه مليح

نجيب ليفرين تاعي نحط كمية من البسكويت ونسويها مليح بالملعقة ثم نحط شرائح من الفراولة في جنب الفيرين

بعد ذلك نحضر كولي الفراولة. نجيب كمية من الفراولة نغسلها ونقطعها الى مربعات ونضيف عليها 2م ك سكر و2م ك ماء و نحطهم عالنار حتى يغلو ونحي هذيك الرغوة لي تتشكل من فوق

نرجع الكريمة بعد ماخرجتها من الثلاجة نخليها قليلا بالخلاط ونضيف عليها علبة ياؤورت صومام ذوق فانيلا

نبدل الرسبسيون ونبقا نخفق بالكريمة ونحط عليها 2م ك كرام شانتي ونخفق مليح ثم نجيب كيس حلواني نحط فيها الكريمة ونحط كمية فوق البسكويت

بعد ماحليت كمية الكريمة فوق البسكويت نحط شرائح في جنب الفيرين ثم نحط كمية اخرى من البسكويت

ثم نحط كمية من كولي الفراولة فوق طبقة الثانية تاع البسكويت و فالاخير نحط طبقة من الكريمة نسويها مليح وندخلها الثلاجة تبرد حوالي ساعة

فالاخير نخرج نحط كمية من الكولي بعد مارحيتو كطبقة اخيرة ونزينو بانصاف من حبات الفراولة

الشكل النهائي لتحلية الفراولة