نبدأ بسم الله ونجيب طنجرة نحط فيها قطعة لحمة كتف ثم نضيف عليهم بصلة مرحية مع سنات ثوم مرحيين ونضيف كمية من الحمص والملح وم ك زيت وفلفل اسود وتابل اللحم وفلفل عكري ثم نجيب حفنة واسعة نحط فيها رطل تليتلي نضيفلو ما ك زيت

نحط الطنجرة تاعي على نار هادئة ونخليها تتقلى مليح ثم نضيف لها ما ك طماطم مصبرة ونقلي مليح

نمرق الطنجرة بالماء ونغلقها ونخلي اللحم تطيب اي تستوي ثم جيب قدرة بالكسكاس ونحط في الكسكاس التليتلي لي كنت شمختو ب ما ك زيت ونحط فالقدرة كمية من الماء ونحطها على النار

بعد ما نخرج البحار على التليتلي المرا الاولى نرجعو فالجفنى ونحط عليه كمية من الماء ونخليه ينشف ثم نرجع مرة أخرى الكسكاس ونبقا نعاود فالمرحلة هذي حتى نتحصل على حبيبات تليتلي طرية

نخلي التليتلي على جنب ثم نفتح عالطنجرة تاعي ونخلي المرق يثقال ونطفي عليه

بعد ذلك نصفي المرق تاعي احسن من باقي العضام تاع اللحم ان وجدت ثم نجيب كسرونة واسعة نحط فيها كمية التليتلي ونضيف عليه كمية من المرق ونخليه على النار يتجمر ويتشرب المرق تاعي

فالاخير نجيب صحن تقديم ونحط فيه التليتلي تاعي ونزينو بحبات الحمص وقطع اللحم وحبة بيض مسلوقة