نبدأ بسم الله ونحط حبات بطاطا تغلي في الماء حتى تطيب اي تستوي ثم نجيب نصف صدر دجاج صغير نرحيه ثم نجيب حبة باذنجان نغسلها ونقشرها ونقطعها الى قطع صغيرة جداً

نجيب مقلاة نحط فيها كمية قليلة من الزيت ونحط البصل المقطع رقيق يتقلى ثم نضيف عليه حبة الباذنجان

نضيف عليه الملح وشة فلفل اسود ونقص عليه النار ونخليه يطيب مليح وبعد ماطابت البطاطا نقشرها ونجيب شوكة ونهرسها مليح ونضيف عليها ما ك زبدة 2 ملعقة ك جبن طري

نخلط مليح البطاطا ونضيف عليه الملح وفلفل اسود ونتركها على جنب ثم نجيب مول زجاجي يدخل الفرن تدهنو بالزبدة ونحط فيه البطاطا بيري تاعي ثم نرجع للدجاج نضيف عليه الباذنجان بعد ماطاب ونعاود نرحيه فالاشوار مليح نضيفلو فلفل اسود وعكري حلو وزنجبيل تابل دجاج ونضيف 2م ك شابليرونخلطو مليح

نشكل الدجاج الى كرات صغيرة ونجيب مقلاة نحط فيها قليل من الزيت ونقلي كرات الدجاج والباذنجان حتى يتحمرو مليح ثم نحيهم (نبعدهم) من المقلاة ونحطهم مباشرة فوق بطاطا بيري كما في الصورة

بعد ذلك نجيب كمية من صلصة طماطم نسخنها قليلا ثم نضيفها على حبات الكفتة ونجيب كمية مليحة من جبن مبشور ونحطو عليها من فوق ثم نجيب ورق طهي نغطي المول ومن فوق ورق المنيوم وندخلو الفرن يكون سخون من قبل

نخليه حتى يذوبلي تماما الجبن ونشعل عليه من فوق يتحمر ثم نطفي النار ونخرجو ونخليه لوقت التقديم

فالاخير شكل غراتان الباذنجان والدجاج مع بطاطا بيري جاء بزاف بنين خصوصا لي اولادها مايحبوش الباذنجان بالطريقة هذي ياكلوه بلا مايحسوه بيه وشهية طيبة