نبدا بسم الله ونجيب كسرونة نحط فيها كاس ماء وكاس الا ربع زيت ونحطها على جنب ثم نجيب ريسبسيون نحط فيه 4بيض وكاس و ربع سكر

ثم نجيب ريسبسيون آخر نحط فيه 2كاس فرينة وربع وكاس الاربع كاكاو مغربلين وم ص بيكربونات الصودا وم متوسطة خميرة كيميائية ونرجع نخفق البيض والسكر مليح ونضيف م ك فانيلا حتى يبياض الخليط فالوقت هذا نحط الكسرونة لي فيها الماء والزيت عالنار حتى يغلو ونطفي عليه

نضيف خليط المكونات الجافة على خليط البيض والسكر ونخفق مليح ونطفي النار على خليط الماء والزيت

بعد ذلك نضيفو مباشرة على خليط الكيك ونواصل الخلط مليح ثم نجيب سينية فرن مقاسها 30على 40ونحط فيها ورق شفاف

نفرغ الخليط فالسينية ونشعل الفرن مسبقا يسخن وندخل الكيك يطيب من تحت ثم نشعلو من فوق وهو يطيب نرجع نحضر الكريمة نجيب ريسبسيون نحط فيها كاس شانتي ونضيف كاس حليب بارد ونصف كاس قهوة باردة ونبدا نخفق حتى تتضاعف الشانتي

بعد ذلك نحط علبة دانيت شكولا ونخلط الكل مليح ندخل خليط الكريمة الثلاجة ونخليه يبرد مليح

بعد ماطاب الكيك نخرجو ونخليه يبرد تماما ثم نجيب سارسو بالشكل لي فالصورة ونحطو في سينية اخرى ونحط ورق طهي ثم نقطع الكيك تاعي على 2ونحط الجزء الاول فالسارسو

نجيب نصف كمية الكريمة ونحطها فوق الكيك ثم بالسباتيلا نوزعها مليح ثم القطعة الثانية تاع الكيك نحيها من ورق الطهي ونضيفها فوق طبقة الكريمة

نجيب باقي الكريمة ونحطها فوق الطبقة الثانية ونحلها مليح بالسباتيلا وندخلها المجمد مدة 2سا او نقدر نخليها ليلة كاملة

بعد ماخليتها ليلة كاملة نخرجها ونحطها فوق سطح العمل ونحضر قناش الشكولا الإقتصادي نجيب كسرونة نحط فيها كاس حليب و3م ك شانتي و2م ك زيت ونخلط بارد ونحطها عالنار كي تغلي نضيفها 200غ بين شكولا بالحليب وشكولا سوداء ونخليها تذوب مليح

نفرغ الڨناش تاعي على الكيك ونعاود ندخلو المحدد حتى يتماسك ونخرجو نقطعو

فالاخير نجيب سكين و وعاء فيه ماء ساخن جدا وكل مرا نقطع الكيك نمسح السكين ونقطع ونحطو فالماء الساخن حتى نقطع كامل الكيك ونزينو

فالاخير شكل ترونش باتسري جينتهم بلوز ايفيلي