نبدا بسم الله ونجيب ريسبسيون نحط فيه حبة بيض وربع كاس سكر ونخلط بالفوي اليدوي ثم نحط 2م ك توبينڨ كراميل او 2م ك معجون المشمس

نخلط مليح ثم نضيف نصف كاس زيت تدريجيا ونخلط مليح

بعد ذلك نضيف 8غ خميرة الحلوى والفرينة انا استخدمت حوالي كاس ونصف فرينة ونلم الخليط مليح حتى نتحصل على عجينة تلتصق نوعا ما باليد ثم نجيب المول لي فالصورة ونحط ورق طهي فيه

نقسم العجينة الى 2قسم ونحل الجزء الاول على ورق الطهي على شكل المول ونحطو داخل المول ونسويه مليح ثم نجيب صحن نحط فيه 5م ك معجون المشمس

نضيف كاس ونصف من الكاوكاو المحمص والمرحي متوسط المعجون ونخلطو مليح ثم نحط. فوق العجينة الاولى بالملعقة

نسوي الحشو مليح ثم نحل العجينة الثانية بنفس الطريقة الاولى ونغطي بيها الحشو تاعي ونغلق مليح جميع الجوانب ونكون شعلت الفرن مسبقا يسخن وندخل الحلوى تطيب من تحت مليح ونشعللها من فوق تطيب

نخرج الحلوى تاعي بعد ماطابت وتحمرت مليح نخليها تبرد ونقلبها في سينية اخرى كنا فالصورة ثم نرجعها على الوجه لي كانت عليه

نجيب حوالي 2م ك معجون وندهنها من فوق كاملة ونرش عليها كاكاو محمص ومرحي ونخليها تبرد ثم نقسمها على 2

نرجع نقطع الحلوى تاعي الى مربعات

فالاخير شكل الحلوى جات بزاف هايلة وبنينة نتمنا تجربوها