نبدا بسم الله ونجيب رطل من العجينة المورقة لي حضرتها قبل ونقسم على 2ونرش طاولة العمل بالفرينة نحل الجزء الاول بالحلال ونجيب سينة فرن نحط فيها العجينة ونحلها مليح

ثم نحل الجزء الثاني بنفس الطريقة ثم نثقب العجينة الاولى مليح بشوكة ونحضر زيتون اخضر و4سنات ثوم

نجيب صلصلة طماطم نضيفلها الثوم والتوابل أنا دائما نخدمها ونخبيها فالمجمد لوقت نحتاجها ثم نحط كمية. مليحة من الصلصة فوق العجينة ونحط زيتون اخضر نقطعو شرائح ثم جبن طري نوزعو عالسطح

نحط كمية مليحة من جبنة شيدار ونغلق بالعجينة الثانية لي كنت فتحتها بنفس الطريقة ونغلق مليح من كل الجوانب ونقطع الزائد ثم نجيب حبة بيض نخلطها مليح ونطلي الكوكا تاعي ثم نقطع بالسكين الى مربعات ونحط حبات زيتون اخضر ونكون شعلت الفرن مسبقا يسخن وندخلها تطيب

نخرج الكوكا تاعي بعد ماطابت ونخليها تبرد ونقطع الحواف الزائدة ثم نقطع الى مربعات

فالاخير نجيب صحن التقديم ونحط حبات الكوكا ونقدمها مع حساء الخضار