نبدا بسم الله ونجيب ربع صدر دجاج نقطعو الى شرائح رقاق ثم نجيب صحن نحط فيه حبة بيض وم ك حليب نخلطهم مليح ونحط شريحة الدجاج في خليط البيض والحليب

نغطس شريحة اللحم مليح ثم مباشرة نحط في صحن فيه نصف كاس نشاء

نقلب شريخة اللحم من كل الجوانب ثم نحطهم في صحن نجيب مقلاة نحط فيها 2م ك زبدة غير مملحة

كي تذوب الزبدة عالنار نبدا نحط شرائح الدجاج ونقليهم مليح

نبقا نقلب فالشرائح من كامل الجهات حتى يتحمرو مليح وكي يطيبو نحطهم في صحن

في نفس المقلاة نحط في ثوم مرحي نقليه مليح على نار هادئة ثم نضيف كاس مرق دجاج ورشة ملح ورشة فلفل اسود

نخلط مليح ونحط م ص نشاء و2م ك عصير ليمون وكزبرة مقطعة رقيقة ونقلي مليح حتى نتحصل على صوص ثقيلة نوعا ما

فالاخير نحط شرائح الدجاج في صحن التقديم ونحط عليها كمية من صوص الدجاج جات بزاف بنينة وهيا اكلة فرنسية