نبدا بسم الله ونجيب ريسبسيون نحط فيه 4كاس فرينة ونعمل حفرة فالوسط نحط فيها م ك خميرة الخبز وم ك سكر ونضيف عليهم كاس حليب دافئ ونغطيهم ونخليهم يتفاعلو مدة 5د

بعد ماتفاعلو نخلط الحليب مع الفرينة ونضيف ابيض حبة بيض وم ص ملح ونبدا نلم فالعجينة بكاس ماء دافئ ونغطيها مدة 5د ثم نعاود نهبط لها الخمور ونعاود نعجنها على طاولة العمل

نلم العجين تاعي ونغطيه بورق شفاف ونخليه يختمر

بعد مااختمرت مليح نهبطلها الخمور ونقطعها الى 8 قطع متساوية نشكلهم كرات

نغطيهم بورق شفاف ونخليهم يرتاحو 5د ثم نبدا نحل بالكرة الاولى ونرش سطح العمل بالفرينة ونجيب صحن نحط فيه الكرة الاولى

ندهنها بالمرڨرين تكون حرارة المطبخ ونعاود نحب الكرة 2و3 و4 و5 و6 و7 بنفس الطريقة وندهن بالزبدة فالاخير الكرة رقم 8 نحلها ونحطها من فوق

نضغط عليهم مليح ونجيب ورق شفاف وندخلهم المجمد مدة ربع ساعة بعد مرور ربع ساعة نحط العجينة على طاولة العمل مرشوشة بالفرينة ونحل العجينة تاعي

نقسم العجينة على 4 اقسام متساوية ثم كل ربع نقسمو الى 4اقسام ثم نبدا نشكل حبات الكرواسون نحط م متوسطة من شكولا الطلي انا حسيت حبة وحدة فقط وكملت باقي الحبات هكاك ولفيت الحبة حتى تحصلت على شكل مثلث

نكمل كامل حبات الكرواسون ونخليهم يختمرو مرة أخرى بعد ذلك ندهنهم بصفار بيض وندخل الفرن يطيبو من تحت ثم نشعل لهم يتحمر من فوق

فالاخير نخرج حبات الكرواسون ونغطيهم بطرشونة ونخليهم يبردو وهذا شكلو النهائي جاء بزاف خفيف ومقرمش من برا وخليت شكولا الطلي لوقت نقدمو نقطع بسكين منشاري ونطلي الشكولا فالوسط والف صحة وعافية