نبدا بسم الله ونجيب ريسبسيون نحط فيها قطع دجاج ونضيف عليهم بصلة وثوم مرحيين ثم نضيف ملح وفلفل اسود وزنجبيل وتابل دجاج وم ك زيت وم ص ملح ونحطها عالنار تتقلى مليح

نمرق الطنجرة بالماء ونغطيها ونخليها تطيب

نجيب 2حبات بطاطا نقشرهم ونغسلهم ثم نقطعهم الى شرائح وكذلك حبة الجريوات

نجيب مقلاة نحط فيها كمية من الزيت ونحطها عالنار ونقلي كامل البطاطا ثم نحطها في صحن

نقلي بعد ذلك الجريوات ونجيب مول زجاجي ندهنو بالزبدة ونحط فيه نصف كمية البطاطا

نرجع للمرق بعد ماطاب مليح نخرج منو قطع الدجاج ونفتتو صغير ونخلي كمية المرق تثقال نحط اللحم على. البطاطا ثم نحط الجريوات

بعد ذلك نحط جبن طري ونجيب صحن نحط فيه حبة بيض وكاس شاي نحط فيه الحليب ونجيب نفس الكاس نحط فيه كمية من المرق بعد مانصفيها ونخلط مليح ثم نفرغ نصف الكمية

بعد ذلك نفرغ باقي البطاطا من فوق ونستفها مليح ثم نفرغ باقي خليط المرق والبيض ونجيب كمية مليحة من جبن مبشور ونغطي كامل السطحو

فالاخير نجيب ورق طهي ونغطي المول ثم ورق المنيوم وندخلو الفرن يطيب من تحت حتى ينشف ونشعلو من فوق يتحمر مليح

فالاخير نقدم الڨراتان تاعي في صحن بعد مانقصو الى قطع جاء بزاف بنين ومشمخ ماهوش ناشف