نبدأ بسم الله ونجيب نصف صدر دجاج نرحيه والبصل كذلك ثم نجيب مقلاة نحط فيها 2م ك زيت ونحطها على النار ونحط البصل نقليها ونضيف عليها حبة جزر نبرشها رقيق ونقلي مليح

نضيف نصف ر دجاج عليها ونحط ملح وفلفل اسود وعكري حار وتابل دجاج ونقلي مليح ثم نضيف قليل من الماء ونقص النار ونخلي الدجاج يطيب

بعد ماطاب الدجاج مليح نطفي النار عليه ونخليه يبرد تماما ثم نعاود نرحيه فالاشوار ونحطو في صحن ونضيف عليه 2 ملعقة ك جبن طري

نخلط الجبن مليح فالدجاج ونضيفلو معدنوس مقطع ثم نجيب خبز التورتيلا انت شريتو جاهز من برا

نقطع حبة التورتيلا على نصفين ونشكلها كورني كما في الصورة

نلصق حبات الكورني بالبيض حتى ماتتحلش في المقلاة وحبة اخرى نقطعها ونشكلها على شكل حبة البوراك ثم نحشي حبات الكورني

نكمل كامل الكمية تاع الحشو ونحط الكورني على جنب

نجيب شابلير نحطو في صحن وصحن الاخر نحط فيه حبة بيض كبيرة نخلطها مليح ونغطس ليكورني مليح فالبيض ومباشرة فالشابلير حتى نكمل كامل الحبات

نجيب مقلاة نحط فيها زيت نخليه يسخن ونقص النار ونحط حبات الكورني يتقلاو مليح من كل الجوانب وحتى من وسط الحشو ونحطهم فوق ورق ماص

فالاخير نقدم حبات الكورني في صحن التقديم مع حساء الخضار جاو بزاف هايلين ومقرمشين نتمنا تجربوهم