نبدأ بسم الله ونجيب ريسبسيون نحط فيه كيلة حليب دافئ مع كيلة ماء ونصف دافئ نخلطهم ونحط عليهم ما ك سكر وم ك خميرة الخبز ونخلط ونضيف كيلة زيت نخلط الكل مليح ونحط ما ص ملح وم ص خميرة الحلوة ونحط كاس فرينة فالاول ونخلط مليح(انا استعملت كيلة صغيرة أقل من الكأس)

نغطيها ونخليها تختمر 5 دقائق ثم بعد الاختمار نخلطها ونبدا نضيف في الفرينة تدريجيا ونلم حتى نتحصل على عجينة طريقة تلتصق باليد نغطيها ونخليها تختمر

نجييب صحن نحضر فيه الحشو نحط ملاعق من الجبن الطري ونضيف ما ك ماييس وزيتون اخضر مقطع رقيق ونخلط الكل مليح ثم نرجع العجينة نهبطلها الخمور ونحطهم على طاولة العمل نعجنها قليلا

نقسم العجينة على 2 ونجيب سينة فرن نحط فيها ورق طهي ونشكل الجزء الاول كرات صغيرة نشكلها ميني هومبرغر ونرجع الحشو نضيفلو دجاج طايب مفتت او تونة حسب الرغبة

نرجع الجزء الثاني من العجينة ونرش سطح العمل بالفرينة ونحل العجينة تاعي مستطيل ونقص الزوائد ونشكلها مستطيل ونجيب سكين ونقطعها الى مربعات ندهن كل مربع بقليل من جبن مبشور ثم نحط ما ك من الحشو في كل مربع ثم جبن مبشور حتى نكمل كامل المربعات

نغلق المربعات تاعي بالشكل الموضح في الصورة ونغلقهم حبة زيتون اسود ونخليهم يختمرو مليح وندهنهم حبة بيض

نرجع لحبات الميني هومبرغر ندهنهم بالبيض ونرش عليهم جلجلانية بيضاء ونشعل الفرن يسخن مليح وندخل مملحات الكاري تطيب اي تستوي من تحت ثم نشعل لهم من فوق يتحمرو مليح ومن بعد ندخل الميني هومبرغر تطيب اي تستوي كذلك ونخرجهم ونخليهم يبردو

فالاخير نقدم مملحلات الكاري في صحن التقديم ونقدمها مع شربة اما حبات الميني هومبرغر نخليهم يبردو تماما ونحطهم في علبة وندخلهم المجمد