نبدا بسم الله ونجيب جفنة واسعة نحط فيها 8كاس فرينة ونعمل حفرة فالوسط نحط حبة بيض وكاس ونصف زبدة ذايبة وباردة وم ك فانيلا ونبسس العجينة مليح

نبدا نبل بالفرينة بماء الزهر والماء وم ص ملح حتى نتحصل على عجينة طريقة نوعا ما نلمها ونخليها ترتاح في كيس بلاستيكي قد ماراح نخلوها ترتاح راح تعطينا نتيجة احسن بعد ماخليتها رتاحت نقطعها الى 11قطعة

نحط 6كرات مع بعض في كيس بلاستيكي و5 كرات في كيس آخر و خليهم نصف ساعة ونرجع للحشو نكون حمصت الكاوكاو كيلو و200غ ونرحيه

نجيب سينة مقاس 35/30سم ونذوب كمية مليحة من الزبدة ونخليها على جنب ثم نرجع للحشو تاعي نحط عليه كاس ونصف سكر ونعاود مرحيه مرا أخرى فالاشوار ونفرغو في صحن واسع ونبلو بماء الزهر يجي مفتول كيما الكسكسي فقط

نرش طاولة العمل بالنشاء ونبدا نحل بالكرة ثم نحط 2كرات فوق بعض ونحلهم مليح حتى يرقاقو بالنشاء ونفصل كل عجينة عالاخرى

نجيب السينية ندهنها بالزبدة مليح ثم نحط العجينة الاولى وندهنها بالزبدة ثم نحط الثانية وندهن بالزبدة ونبقا بنفس الطريقة حتى نكمل الكرات 6 ثم نفرغ كمية الحشو تاعي على سطح العجينة ونسويه مليح ثم نرجع نحل الكرات 5 بنفس الطريقة

نكمل كامل الكرات 5 ثم نجيب طابع مربع ونبدا نحدد حبات البقلاوة ثم نجيب سكين ونقطع الحبات وباستعمال الحلال نتخلص من العجينة الزائدة فالجوانب ثم نشكل بالعجينة لي نزعنهاشكل صدفة او وردة حسب المتوفر ونحطهم على كامل الحبات

نجيب كمية من اللون حوالي 100غ لوز أحمر ونحط كل حبة لوز كما فالصورة ثم نذوب كمية من الزبدة وندهن سطح البقلاوة تاعي مليح ونغطيها ونخليها ليلة كاملة وبعد غد نطيبها

بعد مرور ليلة كاملة نشعل الفرن ونحط البقلاوة تاعي تطيب من تحت ثم نشعل لها من فوق تتحمر وتطيب انا خليتها طابت حوالي ساعة وربع ونخرجها ونعسلها بكيلو عسل المرجان ضفتلو 6م ك ماء زهر

بعد ماخليتها ليلة كاملة تتعسل الغدوة مع العشية قسمتها وحطيتها فالكيسات الخاصة بالبقلاوة وحطيتها فالكيسات