نبدا بسم الله ونحضر الخضار ونغسلها مليح ونجيب حبات الباذنجان ونقشرو مليح ونقطعو مربعات صغيرة

نجيب كذلك الدجاج ونقطعو مربعات و البطاطا كذلك و مباشرة نجيب مقلاة نحط فيها 2م ك زيت ونحط الباذنجان تاعي يتقلى ونبقا نقلب فيه حتى يطيب ونغطي المقلاة بغطاءها

نرجع الدجاج بعد ماقطعتو نحط عليه م ص ملح وفلفل اسود وعكري حلو وتابل دجاج وكركم وم ك زيت ونخلطو مليح ونخليه على جنب

نرجع في نفس المقلاة لي طيبت فيها الباذنجان نحط فيها م ك زيت ونحط حبة بصل مقطعة رقيقة ونحطها عالنار تتكرمل ثم نضيفلها مباشرة الدجاج ونخليهم يطيبو مليح وبعد ذلك نحط م ك فرينة ونخلطها

ثم نضيف كاس حليب ونخلط مليح عالنار كي يتغلي نطفي النار ونحط م ك جبن طري ونخلطها مليح

ونقلي البطاطا في مقلاة اخرى ثم نجيب مول يدخل الفرن نحط البطاطا المقلية ثم نحط فوقها الباذنجان المقلي ونصب عليهم خليط الدجاج ونسويه مليح

نحط كمية مليحة من جبن مبشور ونشعل الفرن من فوق فقط وندخل الڨراتان تاعي يتحمر فقط ونخرجو