نبدا بسم الله ونجيب ريسبسيون نحط فيه 3بيض (انا البيض عندي صغير بزاف على هذاك عملت 3 حبات)لي عندها البيض كبير الحجم 2بيضات يكفو ونحط رشة ملح وم ك فانيلا و6م ك سكر ونخلط مليح

بعد ذلك نضيف 10 م ك زيت ونواصل الخلط ثم 10 م ك حليب ونخلط مليح

ثم نبدا نضيف 2م ك كاكاوبني نوعية جيدة انا إستعملت المرجان ونخلط ثم نحط 10 م ك فرينة مع كيس خميرة الحلوى

نخلط خليط الكيك مليح ثم نجيب سينة فرن مقاس 30/40 نفرشها بورق الطهي

نحضر السيرة لي نشرب بيه الكيك تاعي في كسرونة نحط نصف كاس ماء مع ربع كاس سكر وشريحة ليمون ونحطها عالنار تغلي مدة 10 د ونطفي عليها النار

نفرغ خليط الكيك فالسينية ونسويه مليح ونشعل الفرن يسخن مسبقا ثم نجيب نفس الرسبسيون نحط فيها كاس الاربع شانتي وكاس الاربع حليب بارد

نخفق الشانتي تاعي مليح ثم نذوب 8حبات شكولا ونضيفها عالشانتي تاعي ونخلط مليح

ندخل الشانتي الثلاجة ثم ندخل الكيك يطيب من تحت ثم نشعل من فوق ونخرجو ونحطو على طرشونة يبرد تماما

نقطع الكيك تاعي الى 3اقسام ثم نجيب سو تارت شكل مستطيل ونحط القطع الاولى ونجيب السيرو نشربها مليح

نحط كمية مليحة من الشانتي ونسويها مليح ثم نحط الجزء الثاني ونعاود نشربو مليح

ثم نحط كمية اخرى من الشانتي نسويها مليح بالسباتيلا ثم نحط الجزء الثالث من الكيك نشربو مليح

نجيب الكمية المتبقية ونطلي بيها الكيك من فوق ونسويه مليح نخلي 2م ك من الشانتي للتزيين ثم نجيب علبة شكولا بالحليب ونجيب كسرونة ونذوبها عالنار مع إضافة 3م ك حليب حتى تذوب مليح ونحط الكيك المجمد حتى تتماسك الشانتي ونخرجو ونفرغ عليه الشكولاتة ونرجعها الثلاجة

بعد مابرد الكيك مليح نخرجو ونجيب سكين نحطو في ماء ساخن جدا ونقطع الحواف الاربعة ثم نقطع الكيك الى 7قطع ثم نجيب كمية الشانتي نحطها في كيس حلواني ونزين بها من فوق ثم نجيب حبات كرز ونحطها من فوق التزيبن

فالاخير شكل طرونش باتسري تاعي جاو بزاف خفاف نتمنا تجربوهم قدمتهم مع قهوة المساء