نبدا بسم الله ونجيب رسبسيون ونحضر كل ورقة جينواز ب2 بيضات نحضر الاولى ذوق شكولاتة و الثانية بيضاء نحط 2 بيض مع رشة ملح وم ك فانيلا نخلط قليلا ثم نضيف 5 م ك سكر ونخلط مليح

ثم نضيف 3 م ك زيت ونواصل الخلط من بعد نضيف 5 م ك ماء دافئ ونخلط مليح ثم نضيف 5م ك فرينة مغربلة مع م ص خميرة الحلويات ونخلط مليح

نضيف 2م ك كاكاو بني مغربل ونخلط مليح نحسب سينية فرن مقاس 30/24 ونحط فيها ورق طهي

نفرغ الخليط تاعي فالسينية ونشعل الفرن يسخن من قبل ونعاود نحضر جينواز الثانية بنفس الطريقة مانضيفش الكاكاو فقط

ندخل السينية الفرن مدة 10د ونخرج الجينواز تاعي ونحطها فوق طرشونة ونحيلها الورق ونغطي بالطرشونة ثم نحط الورقة الثانية في سينة الفرن وندخلها تطيب ثم نخرجها

نقلب ورقة الجينواز الثانية على طرشونة ونغطيها هي كذلك ثم نروح نحضر السيرو ونخليه يبرد نحط في كسرونة كاس ماء مع نصف كاس سكر ونخلط مليح ونحطو فوق النار يغلي مدة 10د ونطفي النار عليه ثم نجيب ريسبسيون نحط فيه كاس ونصف شانتي مع كاس حليب بارد ونبدا نطلع فالشانتي تاعي

بعد ماطلعت مليح نحطها فالثلاجة ونرجع الجينواز تاعي نحط الورقة الاولى فوق سوتارت مستطيلة الشكل فوق صحن دوار لتسهيل العمل نجيب السيرو مع بانسو ونشرب الورقة الاولى مليح بالسيرو

نحط كمية مليحة من كرام شانتي من فوق ونسويها مليح بالسباتيلا ثم نعمل خطوط. من شكولا الطلي ونجيب كمية من المكسرات كاجو وجوز ونقطعهم قطع رقيقة

نحط طبقة المكسرات من فوق نحط ورقة الجينواز البنية من فوق ونشربها مليح بالسيرو

نحط كمية الشانتي ونعاود نسويها ثم خطوط شكولا الطلي وكاجو مفتت

ثم جاتني الفكرة لاول مرة وجبت 2علب بسكويت وشمخت البسكويت فالحليب وحطيتو كطبقة ثالثة ثم زدت طبقة رابعة لكن عكس البسكويت وحطيتو من الطبقة الداخلية كما موضح فالصورة وجبت بقية الشانتي وطليت الكيكة تاعي مليح والجوانب كذلك

سويتها مليح وحطيتها فالمجمد حوالي نصف ساعة وخرجتها للتزيين نزيد نخلط كاس كرام شانتي مع كاس الاربع حليب نخلطها مليح و نزيدلها م ك شكولا الطلي ونطلعها مليح ونحط كمية فوق الكيك نسويها مليح ثم نذوب شكولا بالحليب ونشكل خطوط على جوانب الكيكة ثم نشكل وردات بالشانتي فالجوانب كما فالصورة

نرجعلها الثلاجة ثم نخرجها ونزينها بشكولا قطع من الجوانب وشكولا ذوق البيستاش

الشكل النهائي لكيكة تاعي صنعتها بمناسبة انتهاء الموسم الدراسي ولاول جاتني الفكرة اني نحضر كيكة بالجينواز و البسكويت