لتحضير الكيك: بوعاء كبير، بنخفق البيض مع السكر، و الفانيليا بالخلاط الكهربائي أو بالمضرب اليدوي الكهربائي كتير منيح لحتى يصير لونه فاتح

و بعدين ضيفولهم الزيت، و الحليب و كملوا أخفقوهم كتير منيح

بوعاء ثاني، ننخل فيه الطحين، و الكاكاو، و البكينغ باودر، و البكينغ صودا، و رشة الملح و بعدين نضيفهم عالخليط

قلبوا الخليط كتير منيح لحتى يختفي كل الطحين، بعدين ضيفوا قطع بسكويت الأوريو المكسرة عشوائيا و قلبوهم شوي لحتى يفوتوا بالخليط كتير منيح

و بعدين بنجيب القالب و بندهنوا بالزبدة أو نحط فيه ورق الزبدة، و بنصب فيه الخليط

و بنفوتها عالفرن يلي شعلناه مسبقا عالدرجة حرارة 170°C لمدة 35 دقيقة تقريبا أو لحتى تستوي و تطلع السكينة نضيفة لما نغرسها بنص الكيكة

لتحضير الكريمة: أخفقوا كريمة الخفق لحتى تصير كتير متماسكة

و بوعاء ثاني، أخفقوا الجبنة الكريمية مع السكر الناعم لحتى تصير كتير ناعمة

و بعدين ضيفوا الكريمة المخفوقة فوق خليط الجبنة الكريمية و أخلطوهم كتير منيح مع بعضهم و قلبوهم بخفة

و بعدين ضيفوا بسكويت الأوريو يلي طحناه كتير ناعم لحتى يصير كأنو بودرة ت أخلطوه برفق لحتى يفوت بكل خليط الكريمة

لمكونات التزيين: بعد ما نطالع الكيكة من الفرن نتركها بالقالب لحتى تبرد تماما قبل ما نطالعها و نحطها بالصحن، و بعد ما نحطها بالصحن، بنحط عليها الكريمة عكل الوجه

و بعدين زينوها بحبات بسكويت الأوريو حبات كاملين أو مقسومين عنص مثل ما بدكم و شو بتحبوا، أو فيكم أنو ترشوا عليهم عالوجه فتافيت بسكويت الأوريو المطحون كتير ناعم و شوكولا داكنة ذايبة إذا حبيتوا

ملاحظات بتهمكم: فيكم أنو تعملوها طبقتين، و تحشوها بنص بنفس الكريمة

و بتقدروا كمان أنو تستبدلوا الجبنة الكريمية بشوكولا"نوتيلا"إذا كان بدكم كمية شوكولا أكثر

و فيكم كمان أنو تقدموها بمناسبة من المناسبات، أو حتى للتقديم بكاسات فردية(و هيك بتحولوها لنسخة"أوريو ديسر"و هاي الوصفة كتير مميزة و حلوة