نبدأ بسم الله ونجيب طنجرة نحط فيها ربع صدر دجاج مقطع ونضيف عليه البصل والثوم مرحيين ونحط الملح والفلفل الاسود والزنجبيل والبابريكا الحلوة وم ك زيت والمعدنوس المقطع رقيق ونحطها على النار تتقلى من جهة اخرى نحط في كسرونة راس شفلور (قرنبيط) صغير نقطعو الى ازهار صغيرة ونضيف عليه الماء وم ص ملح ونخليه يطيب مليح

نضيف عالمرق ما ك طماطم مصبرة ونقلي جيداً ثم نحضر البطاطا نقشرها ونغسلها

نقطع البطاطا الى انصاف ونحطها مباشرة في الطنجرة ونقلي الكل مع بعض ونمرق بالماء ونخليها تطيب اي تستوي مليح هيا والدجاج بعد مدة نفتح الطنجرة ونخلي المرق يرجع ثقيل تماما

نجيب لوح تقطيع نحط فوقها البطاطا ونمعسها بشوكة حتى تصبح ناعمة ونحط ربع صدر دجاج بعد ماطاب نخليه يبرد تماما

نرجع فوق نفس اللوح نحط زهرات الشفلور (القرنبيط) ونمعسها بشوكة مليح حتى يصبح ناعم ونفرغو في صحن كان فيه كمية المرق المتبقية من الطنجرة نضيف عليه معدنوس مقطع رقيق وحبات زيتون اخضر مقطع شرائح رقيقة

نخلط الشفلور (القرنبيط) مليح حتى يتشرب المرق مليح ثم نفرغو مع كمية البطاطا ونخلط الكل مليح ثم نفتت كمية الدجاج نجيب مول زجاجي يدخل الفرن ندهنو بالزبدة ونفرغ مباشرة. فيه خليط البطاطا والشفلور ونحط كمية مليح من الجبن المبشور وقطع دجاج نفتتها من فوق

نشعل الفرن يسخن ونحط المول حتى يتشرب مليح من تحت ونشعلو من فوق يتحمر مليح ويذوب الجبن ونزينو يحبة زيتون في الوسط