نبدا بسم الله ونجيب علبة بسكويت نحطها في رسبسيون ونقوم بتفتيتها قطع متوسطة دون رحيها ونجيب كسرونة نحط فيها لتر حليب

نضيف عالحليب 4م ك نشاء و4 م ك كاكاو بني وعلبة فلان ذوق شوكولاتة و2م ك سكر

ثم نجيب علبة بسكويت ماكسون يشبه بسكويت اوريو ننزع منه الكريمة البيضاء ونضيفها لخليط الحليب ونخلطها بارد في بارد

نحط الخليط عالنار ونبقا نحرك فيه ثم نجيب نصف علبة شوكولاطة سوداء

بعد ماثقال الخليط نطفي النار ونضيف نصف علبة شكولا سوداء وم ك زبدة ونخلطهم حتى يذوبو تماما

نرجع نفرغ نصف الكريمة على البسكويت ونحتفظ بالنصف الاخر ثم نجيب سارسو مربع الشكل ونغلفو بورق شفاف ونحطو في سينية أخرى

نفرغ خليط البسكويت والكريمة فالمول ونسويه مليح بالملعقة

نرجع نفرغ باقي خليط الكريمة فوق البسكويت ونسويه مليح وندخلو المحدد مدة ربع ساعة او الثلاجة ونرجع نجيب كسرونة نحط فيها علبة شوكولاتة بالحليب نضيف عليها حوالي 2م ك حليب

نرجع نخرج المول فالمجمد وبعد ماذابت الشكولاتة نطفي النار ونيضيفلها م ص زبدة

نفرغ خليط الشكولاتة بالحليب فوق الكريمة ونسويها مليح ثم نحط انصاف حبات البسكويت

ندخل المول الثلاجة ونخليها مدة 5 ساعات فالثلاجة ثم نخرجها ونقطعها مربعات

فالاخير شكل تحلية الشكولاتة جات لذيذة وسميتها تحلية العمر (لما كنت نحضر فيها خطر في ذهني هذا الاسم وحبيت نسميها تحلية العمر)