أولا نغسل الارز كم مرة ، ثم ننقعه ، نقطع البصل و نحطه بمقلاية مع زيت وبعد ان يذبل قليلا نضيف له لحم المفروم مع شوية ملح وفلفل و كزبرة مطحونة واربع سنان ثوم مطحون ، ونخلي الكل على نار هادئة لغاية الإستواء.ونفس المقلاية اللي سوينا فيها اللحم المفروم بعدما يستوي نشيله على جنب ، ونحط بنفس المقلاية البندورة عشان تاخد نكهة اللحم.

في هذه الاثناء نقور الكوسة بشكل جيد ، وبعد الانتهاء يكون اللحم المفروم جهز ،نخليه يبرد شوي ، ثم نحشيه في الكوسة ، ونجيب مقلاية مرة ثانية ونحط فيها زيت ، ونقلي فيها الكوسة المحشية على نار هادئة عشان ما تحترق.

بعد نصف ساعة يكون الرز نقع ، نشيل المي. بعدين نشوح الشعيرية في زيت بطنجرة غير لاصقة. بعدما يصير لون الشعيرية اشقر مايل للبني شوي ، نضيف مي ، انا حطيت كاستين رز ، بنفس الكاسة نحط كاستين مي ونصف ، ونحط ملح ، ونخلي المي حتى يغلي ، بعدين نحط الارز ،ونغطي الطنجرة ، على نار متوسطة ، وبعدما ينشف المي نحط ملعقة ونص سمن حيواني على وش الارز ، ونقلب قلبتين ثلاثة ، ونرجع نغطيه ونقص النار ، ونخليه حوالي 10 د كمان بس على نار هادئة جدا لغاية ما يستوي ، نطفي النار و نكشف شوي على غطاء الطنجرة عشان يكون مفلفل.

بعدما تستوي الكوسة المحشية اللي كانت على المقلاية نحطها على جنب ، ونجيب المقلاية اللي حطينا فيها البندورة ، و نخليها تنقلى مع فصوص ثوم مهروس وملح وفلفل اسود ، وبعدما تذبل البندورة ونهرسها بالملعقة الخشبية ، نحط فيها الكوسة اللي كنا قليناها عشان تتشرب الصوص.

بعدما تتشرب الكوسة صوص البندورة ، نطفي عليها ، ونجيب الأرز بالشعيرية ، نحطه بصحن ، ونحط صوص البندورة على وش الارز ، وبعدها الكوسة ، ونكمل بالصوص المتبقي من فوق ، وبهيك نكون خلصنا الطبخة ، جربوها على ضمانتي ، تطلع ولا اروع ، ومع طعم السمن الحيواني في الارز بيكون ولا أحلى !